ახალი ამბები

ალბანეთის პრემიერ-მინისტრმა ედი რამამ განაცხადა, რომ დასავლეთ ბალკანეთი ევროკავშირის შუაგულში "ხვრელს" წარმოადგენს, რაც სავალალო შედეგების რისკს შეიცავს.

ვითარების არსი: Die Welt-თან ინტერვიუში ედი რამამ დასავლეთ ბალკანეთისთვის ევროკავშირის წევრობის არარსებობა ღია მუცლის ღრუს შეადარა.

• "ღია მუცელი ცუდია. ეს ინფექციებით, ჭრილობებითა და დაჩირქებით გვემუქრება. რუსეთი - ეს ვირუსია. რადიკალური ისლამი - ეს ვირუსია. კრიმინალი - ეს ვირუსია," - აღნიშნა მან.

სტრიქონებს შორის: ალბანეთის პრემიერ-მინისტრმა აღნიშნა, რომ ევროკომისიის პრეზიდენტ ურსულა ფონ დერ ლაიენს შვიდი შვილი ჰყავს.

• "ჩვენც შვიდი ვართ - შვიდი სახელმწიფო, რომელთაც ევროკავშირში გაწევრიანება სურთ. რა არის უკეთესი: შვილების ოჯახში აღზრდა თუ მათი გარეთ დატოვება, სანამ გაიზარდებიან? რა თქმა უნდა, ბავშვს მაგიდასთან ნაკლები უფლება აქვს. მას ყველაფრის მოთხოვნა არ შეუძლია. მაგრამ იქ, გარეთ, რისკები დიდია," - თქვა რამამ.
• "ერთი ბავშვი რუს ბანდიტებს დაუმეგობრდება. მეორე ჩინურ სათამაშოებს მიეჯაჭვება. მესამე ექსტრემიზმს აღმოაჩენს და მთელ უბანს ააფეთქებს," - ხაზი გაუსვა მან.

დიდი სურათი: ედი რამამ მკაცრად გააკრიტიკა ევროკავშირის მიდგომა უკრაინის ევროკავშირში გაწევრიანების შესახებ მოლაპარაკებებისადმი.

• რამა დასავლეთ ბალკანეთის ქვეყნების ევროკავშირში გაწევრიანების პროცესზე საუბრობდა და გაიხსენა, რომ 1989 წელს აღმოსავლეთ გერმანიისთვის არ მოუთხოვიათ გაწევრიანების შესახებ მოლაპარაკებების ყველა - 33-ვე თავის შესრულება.
• "ევროკავშირი, ალბათ, ჩვენგან კიდევ უფრო მეტ ძალისხმევას მოითხოვს. მაგრამ ჩვენ გვსურს ვიყოთ მისი ნაწილი. შეხედეთ უკრაინას. ის, რასაც მათ ჰპირდებიან - ტყუილია," - განაცხადა მან.
• "მათ არასდროს მიიღებენ გაწევრიანების ჩვეულებრივი პროცესით, ყველა კრიტერიუმის დაცვით. ეს ყველამ იცის. რეალისტური გადაწყვეტა იქნებოდა უკრაინის მოლაპარაკებებში ახლავე ჩართვა და მისთვის სრულუფლებიანი წევრობის მინიჭება დამსახურების მიხედვით," - ალბანეთის პრემიერმა.

კონტექსტი: ამასთან, რამამ იხუმრა აშშ-ის დემოკრატიული პარტიის წარმომადგენლებზე მის ქვეყანაში მიმდინარე აქციების კონტექსტში, რომელიც აშშ-ის პრეზიდენტის სიძესთან, ჯარედ კუშნერთან დაკავშირებული კურორტის მშენებლობის წინააღმდეგაა.

• "ჩემს დემოკრატ მეგობრებს ამერიკაში ვუთხარი: თუ ტრამპის დამარცხება ამერიკაში არ შეგიძლიათ, შურისსაძიებლად ალბანეთში ნუ ჩამოხვალთ. ეს უსამართლობაა," - თქვა ალბანეთის პრემიერმა.