ახალი ამბები

აზერბაიჯანის პრეზიდენტმა საფრანგეთის მოქალაქე, მარტინ რაიანი შეიწყალა.

მისი გათავისუფლება დროში ზუსტად ემთხვევა ევროკავშირის მიერ რუსი მილიარდერის, ალიშერ უსმანოვისთვის სანქციების მოხსნას.

ვითარების არსი: გადაწყვეტილების მიღებისას გათვალისწინებული იყო მსჯავრდებულთა (რაიანთან ერთად სულ 20 პირი შეიწყალეს) ჯანმრთელობის მდგომარეობა, ოჯახური სტატუსი, დანაშაულის სიმძიმე და ციხეში ყოფნისას გამოვლენილი ქცევა.

• ფრანგი ბიზნესმენი მარტინ რაიანი აზერბაიჯანში 2023 წლის დეკემბერში დააკავეს.

• 2026 წლის მარტში მას საფრანგეთის სპეცსამსახურების სასარგებლოდ ჯაშუშობის ბრალდებით 10 წლით თავისუფლების აღკვეთა მიესაჯა.

• რაიანის დღევანდელი შეწყალების შემდეგ გამოდის, რომ ბაქოს საპყრობილეში საფრანგეთის მხოლოდ ერთი მოქალაქე - ანას დერაზი რჩება (მას ყოფილი სენატორისგან ქრთამის აღების ბრალდებით 12 წელი აქვს მისჯილი).

• ჯერჯერობით უცნობია, შეძლებს თუ არა პარიზი მეორე დაკავებული მოქალაქის გათავისუფლებასაც.

  
  

წინარე ისტორია: მედია მარტინ რაიანის გათავისუფლებას პირდაპირ უკავშირებს ევროპული სანქციების სიიდან ალიშერ უსმანოვის ამოღებას.

• როგორც Financial Times წერდა, უსმანოვისთვის სანქციების მოხსნას საფრანგეთი სწორედ ოფიციალური ბაქოს ზეწოლის გამო ითხოვდა.
• გამოცემის თანახმად, პარიზის ეს მოულოდნელი პოზიცია აზერბაიჯანში დაკავებული საფრანგეთის მოქალაქეების დახსნის მცდელობით იყო ნაკარნახევი.
• საფრანგეთის გარდა, უსმანოვისთვის სანქციების მოხსნას ევროკავშირის შიგნით სლოვაკეთიც აქტიურად ითხოვდა.

დიდი სურათი: სამშაბათს საღამოს ევროკავშირმა ოფიციალურად გამოაქვეყნა გადაწყვეტილება რუსეთის წინააღმდეგ სანქციების პირდაპირ 3 წლით გახანგრძლივების შესახებ, საიდანაც უსმანოვი და მიხაილ ფრიდმანი ამოიღეს.

• ზოგიერთი გამოცემის ცნობით, ფრიდმანისთვის სანქციების მოხსნა ლუქსემბურგმა მოითხოვა - რუს მილიარდერს ქვეყნის წინააღმდეგ 16-მილიარდიანი სარჩელი აქვს აღძრული.

კონტექსტი: როგორც სააგენტო Reuters-ი აღნიშნავდა, ბოლო ქვეყანა, რომელიც პროცესს ვეტოს ადებდა, ლატვია იყო, თუმცა საბოლოოდ კენჭისყრისას რიგამ თავი შეიკავა და გარიგებაც შედგა.