ახალი ამბები

აზერბაიჯანის საგარეო საქმეთა მინისტრი ჯეიჰუნ ბაირამოვი კიევს ეწვია და უკრაინელ კოლეგას, ანდრი სიბიჰას შეხვდა.

ვითარების არსი: კიევში, უკრაინის საგარეო საქმეთა სამინისტროს პარკში მდებარე მემორიალთან, ბაირამოვმა გვირგვინით შეამკო და პატივი მიაგო დაღუპული უკრაინელი გმირების ხსოვნას. 

• აზერბაიჯანის საგარეო საქმეთა სამინისტროს ცნობით, შეხვედრის ოფიციალური ცერემონიის შემდეგ, მინისტრები უკრაინული წარმოების უპილოტო საფრენი აპარატების გამოფენაზე მივიდნენ.
• ბაირამოვმა ანდრი სიბიჰასთან ერთობლივ პრესკონფერენციაზე განაცხადა, რომ ეკონომიკური თანამშრომლობა აზერბაიჯანსა და უკრაინას შორის პარტნიორობის ერთ-ერთ საკვანძო მიმართულებად რჩება.

სტრიქონებს შორის: მისი თქმით, აზერბაიჯანის სახელმწიფო ნავთობკომპანია SOCAR უკვე მრავალი წელია წარმატებით საქმიანობს უკრაინის ბაზარზე და გეგმავს საქმიანობის გაგრძელებას.

• ბაირამოვმა ასევე აღნიშნა, რომ ბაქოსა და კიევს შორის მიმდინარეობს აქტიური დიალოგი ენერგეტიკის სფეროში თანამშრომლობის განვითარებაზე. მან ხაზი გაუსვა, რომ დღეს აზერბაიჯანს ბუნებრივი გაზი გააქვს 16 ქვეყანაში, მათ შორის ევროპის 12 სახელმწიფოში, რომელთაგან ათი ევროკავშირის წევრია.
• "საჭიროების შემთხვევაში, მოხარული ვიქნებით, გაზი მივაწოდოთ მეგობარ უკრაინასაც. გარდა ამისა, ჩვენს ქვეყნებს შორის არსებობს თანამშრომლობის შესაძლებლობები ენერგეტიკული უსაფრთხოების უზრუნველყოფის სფეროში უფრო ფართო გეოგრაფიაზე," - ხაზგასმით აღნიშნა მინისტრმა.

დიდი სურათი: უკრაინაში ოფიციალური ვიზიტის ფარგლებში, აზერბაიჯანის საგარეო საქმეთა მინისტრი ჯეიჰუნ ბაირამოვი ეწვია ქალაქ ირპენს, სადაც გაეცნო ქალაქის ინფრასტრუქტურის აღდგენის სამუშაოებს.

• ბაირამოვმა ყვავილებით შეამკო გამოჩენილი აზერბაიჯანელი ოფთალმოლოგის, აკადემიკოს ზარიფა ალიევას ძეგლი, რის შემდეგაც ეწვია ირპენის საქალაქო პოლიკლინიკას, რომელიც აზერბაიჯანის მთავრობისა და კომპანია SOCAR Ukraine-ის მხარდაჭერით აღდგა.
• შემდეგ აზერბაიჯანის საგარეო საქმეთა მინისტრი ზარიფა ალიევას სახელობის ირპენის მე-12 ჰუმანიტარულ ლიცეუმს ეწვია, რომელსაც კაპიტალური რემონტი ჩაუტარდა აზერბაიჯანის პრეზიდენტის, ილჰამ ალიევის დავალებით. ელექტროენერგიის შეუფერხებელი მომარაგების უზრუნველსაყოფად სკოლა ასევე გენერატორით აღიჭურვა.
• გარდა ამისა, მინისტრს წარუდგინეს ირპენის აღდგენის ახალი პროექტები. გავრცელებული ინფორმაციით, აზერბაიჯანის მთავრობა ქალაქში რეკონსტრუქციის კიდევ ოთხი მასშტაბური პროექტის განხორციელებას გეგმავს.

კონტექსტი: უკრაინის საგარეო საქმეთა მინისტრმა ანდრი სიბიჰამ განაცხადა, რომ აზერბაიჯანი ძლიერი სახელმწიფოა, რომლის გავლენაც მზარდია და მნიშვნელოვან როლს ასრულებს რეგიონში.

• მან ხაზი გაუსვა, რომ აზერბაიჯანის  მონაწილეობა ომის შეწყვეტისკენ მიმართულ ძალისხმევაში ძალიან მნიშვნელოვანია.
• სიბიჰას თქმით, უკრაინა და აზერბაიჯანი სტრატეგიული პარტნიორები არიან.
• "აზერბაიჯანული ბიზნესი ყოველთვის აქტიური იყო უკრაინაში და ჩვენ გვსურს, რომ ეს თანამშრომლობა გაფართოვდეს. აზერბაიჯანელი მეგობრებისთვის გვაქვს წინადადებების პაკეტი. ჩვენ ასევე დაინტერესებული ვართ უკრაინაში ენერგორესურსების მიწოდების დივერსიფიკაციით. მთლიანობაში, აზერბაიჯანს სტრატეგიული მნიშვნელობა აქვს მთელი ევროპის ენერგეტიკული უსაფრთხოებისთვის, უკრაინის ჩათვლით. ჩვენ აქტიურად ვმუშაობთ ამ მიმართულებით და დარწმუნებულები ვართ, რომ მნიშვნელოვან შედეგებს მივაღწევთ," - აღნიშნა მან.