სომხეთის პრემიერ-მინისტრ ნიკოლ ფაშინიანს ევროკავშირში გაწევრიანებისთვის ევრაზიული კავშირიდან გასვლა გარდაუვლად მიიჩნია. მისი თქმით, ევროკავშირის წევრობის განაცხადის წარდგენას სომხეთი 2027-2028 წლებში გეგმავს.
ვითარების არსი: მანამდე რუსულ მედიაში გავრცელდა ინფორმაცია, რომ რუსეთმა, ბელარუსმა, ყაზახეთმა და ყირგიზეთმა შესაძლოა შეაჩერონ სომხეთთან ევრაზიული ეკონომიკური კავშირის შეთანხმების მოქმედება. ეს ამ ქვეყნებთან საბაჟო კონტროლის აღდგენას ნიშნავს.
- ვლადიმერ პუტინმა არაერთხელ მოითხოვა სომხეთისგან, ჩაატაროს რეფერენდუმი, სადაც ხალხი არჩევანს ევროკავშირსა თუ ევრაზიულ კავშირს შორის გააკეთებს.
- აგვისტოს ბოლოს ნიკოლ ფაშინიანმა განაცხადა, რომ ევროკავშირში სომხეთის გაწევრიანების შესახებ რეფერენდუმი შესაბამისი განაცხადის წარდგენისა და საგზაო რუკის ფორმირების შემდეგ ჩატარდება.
სტრიქონებს შორის: ფაშინიანმა აღნიშნა, რომ ამჟამად სომხეთი ევრაზიული ეკონომიკური კავშირიდან გასვლას არ გეგმავს.
- თუმცა ჟურნალისტებთან საუბრისას განაცხადა, რომ შეუძლებელია ერთდროულად ევრაზიულ კავშირსა და ევროკავშირში ყოფნა.
- "ჩვენ არ დაგვიწყია ევრაზიული კავშირიდან გასასვლელად მზადება, ჩვენ ვემზადებით, რომ ჩვენს ხალხს ალტერნატიული ვარიანტები შევთავაზოთ, როგორც დავპირდით. ჩვენს ხალხს უნდა ჰქონდეს არჩევანის გაკეთების შესაძლებლობა. ჩვენ არ ვაპირებთ ევრაზიული კავშირიდან გასვლას, თუმცა თქვენ იცით, რომ ამ სტრუქტურაში ჩვენი პარტნიორები აყენებენ საკითხს ჩვენი საგარეო პოლიტიკური კურსის განსაზღვრისა და რეფერენდუმის ჩატარების შესახებ." - ხაზი გაუსვა სომხეთის პრემიერმა.
- "მე განვაცხადე, რომ ამ მომენტისთვის რეფერენდუმის ჩატარების საფუძველი არ არსებობს. სანამ ევრაზიული კავშირიდან გასვლისა და ევროკავშირში გაწევრიანების შესახებ რეფერენდუმი ჩატარდება, გარკვეული პროცედურების გავლაა საჭირო. ჩვენ ამ გზით მივდივართ. ჩემთვის აშკარაა, რომ პროცესი იქით მიდის, რომ ოფიციალურად წარვადგინოთ განაცხადი - 2027 ან 2028 წელს - ევროკავშირის სრულუფლებიანი წევრის სტატუსის მიღების პროცედურის დასაწყებად," - თქვა მან.
ჩაშლილად: მანამდე ფაშინიანმა განაცხადა, რომ სომხეთმა შესაძლოა ევროკავშირში წევრობის განაცხადი 2027 ან 2028 წელს წარადგინოს.
- "დღეს ჩვენ ამას განვიხილავთ ევროპელ პარტნიორებთან, განვიხილავთ ქვეყნის შიგნითაც. ჩვენ განვიხილავთ ასეთ შესაძლებლობას. და ჩვენთვის ძალიან მნიშვნელოვანია, უბრალოდ ტექნიკური ნაბიჯი კი არ გადავდგათ, არამედ მთელ ამ პროცესს თან ახლდეს პოლიტიკური დიალოგი სწორედ ამ თემის ირგვლივ. ეჭვიც კი არ მეპარება, რომ დადგება დრო და ის არც ისე შორსაა," - აღნიშნა ქვეყნის პრემიერმა.
- კონკრეტული პასუხის გაცემის თხოვნაზე ფაშინიანმა თქვა: "არ ვიცი, რამდენად რეალისტურია ეს, მაგრამ მომავალი წელი შეიძლება იყოს რეალისტური, 2028 წელი შეიძლება იყოს რეალისტური."
- ამასთან, მან ხაზი გაუსვა, რომ ახლა სომხეთი კონცენტრირებულია დიალოგზე სავიზო რეჟიმის ლიბერალიზაციის შესახებ და მიზანია 2029 წლისთვის უვიზო რეჟიმის მიღწევა.
- "და ეს გახდება მორიგი ძალიან მნიშვნელოვანი ეტაპი ევროკავშირთან ჩვენი ურთიერთობების განვითარების პროცესში," - განაცხადა მან.
დიდი სურათი: 10 ოქტომბრიდან ევროკავშირმა ორწლიანი ვადით სავაჭრო პრეფერენციები მიანიჭა სომხური ექსპორტის დაახლოებით 80%-ს.
- ეს არის რუსეთის მიერ სომხური პროდუქციის იმპორტზე დაწესებულ შეზღუდვებზე პასუხი.
დაკავშირებული თეგები
