ახალი ამბები

დონალდ ტრამპის გუშინდელი განცხადების მიუხედავად, თითქოს მხარეებმა ენერგეტიკულ ობიექტებზე თავდასხმების შეწყვეტაზე შეთანხმებას მიაღწიეს, რუსეთმა და უკრაინამ იერიშები მაინც გაცვალეს.

ვითარების არსი: აშშ-ის პრეზიდენტის განცხადებიდან რამდენიმე საათში რუსულმა დრონებმა ხარკივისა და კიევის ოლქებში მდებარე ბენზინგასამართ სადგურებზე მიიტანა დარტყმა.

• უკვე ღამის საათებში უკრაინულმა უპილოტო საფრენმა აპარატებმა ქალაქ სიზრანსა და სამარის ოლქში მოქმედ ნავთობგადამამუშავებელ საწარმოებს შეუტია.

ჩაშლილად: ბრიტანული Financial Times-ის წყაროების ცნობით, ტრამპის განცხადება მიღწეული შეთანხმების შესახებ მოულოდნელი აღმოჩნდა ორივე მხარისთვის - "პრეზიდენტმა იჩქარა", - აცხადებს ერთ-ერთი წყარო.

• ინფორმირებული წყაროების თანახმად, მხარეები დაუბრუნდნენ ენერგეტიკულ ინფრასტრუქტურაზე დარტყმების მორატორიუმის იდეას, რომელიც პირველად გასულ წელს გაჟღერდა, თუმცა შეთანხმება ამ დრომდე არ არსებობს.
• აშშ-ის პრეზიდენტის განცხადებას "ტრამპის ექსპრომტს" უწოდებენ მედია "Агентство"-ს წყაროები კრემლში.
• იმავე FT-ის ცნობით, მოსკოვში აცხადებენ, რომ პუტინი ენერგეტიკულ ობიექტებზე შეტევების შეჩერებას არ აპირებს: კრემლი დარწმუნებულია, რომ ზამთარში მსგავსი იერიშები კიევზე წნეხს გაზრდის და მოლაპარაკებების მაგიდასთან უკრაინის პოზიციებს შეასუსტებს.

კონტექსტი: ტრამპის ნათქვამს მალევე გამოეხმაურა უკრაინის პრეზიდენტი; ვოლოდიმირ ზელენსკიმ აღნიშნა, რომ კიევი პარტნიორებისგან კონკრეტიკას ელოდება და საუბარი უნდა იყოს კრიტიკულ ინფრასტრუქტურაზე თავდასხმების შეჩერებაზე.

• მანამდე დონალდ ტრამპმა დიზელის საწვავზე საერთაშორისო ფასების ზრდის მიზეზად რუსულ გადამამუშავებელ ქარხნებზე უკრაინული დარტყმები დაასახელა და აღნიშნა: "პრეზიდენტ ზელენსკის სხვა სამიზნეები უნდა შეერჩია".