ახალი ამბები

გერმანულმა Der Spiegel-მა სამშაბათს გაავრცელა ინფორმაცია, რომ გერმანიის ფედერალური დაზვერვის სამსახურის (BND) ყოფილი ხელმძღვანელი, აუგუსტ ჰანინგი, აზერბაიჯანისთვის ინფორმაციის შეგროვებაშია ეჭვმიტანილი.

ვითარების არსი: ინფორმაცია მას შემდეგ გამოქვეყნდა, რაც გერმანელმა პროკურორებმა განაცხადეს, რომ ჰანინგი, რომელიც გერმანიის საგარეო დაზვერვის სამსახურს ხელმძღვანელობდა, ჯაშუშობისა და სახელმწიფო ღალატის ბრალდებით დააკავეს.

• ხელისუფლებამ მანამდე განაცხადა, რომ მას უცხო ქვეყნის დაზვერვის სამსახურისთვის საიდუმლო ინფორმაციის გადაცემის მცდელობა ებრალებოდა.
• Der Spiegel-ის ცნობით, პირი, რომელმაც ჰანინგისგან საიდუმლო ინფორმაცია შეუკვეთა, აზერბაიჯანის დაზვერვის ოპერატიული თანამშრომელი იყო. გამომძიებლები ახლა იკვლევენ, მიაღწია თუ არა საბოლოოდ აზერბაიჯანელ ოპერატიულ თანამშრომლამდე უსაფრთხოების ანალიზმა, რომელიც ჰანინგმა BND-ის მაღალჩინოსნისგან მოპოვებული საიდუმლო ინფორმაციის გამოყენებით მოამზადა.

სტრიქონებს შორის: გამოცემა წერს, რომ ჰანინგის კავშირები აზერბაიჯანის წარმომადგენლებთან კარგად არის დოკუმენტირებული. ის იყო "გერმანია-აზერბაიჯანის ფორუმის" გამგეობის წევრი, რაც დასტურდება ორგანიზაციის მიერ 2025 წლის ივლისში გამოქვეყნებულ განცხადებაში.

• 80 წლის ჰანინგი BND-ის ხელმძღვანელად 1998 წლიდან 2005 წლამდე მუშაობდა. გავრცელებული ინფორმაციით, იგი სამშაბათს დილით, დასავლეთ გერმანიის ქალაქ მიუნსტერთან ახლოს, ნორდვალდეში მდებარე საკუთარ სახლში დააკავეს. ბავარიაში ასევე დააკავეს მისი ყოფილი თანაშემწე, რომლის ვინაობაც დასახელებულია, როგორც მანფრედ დ. 
• ჰანინგის დაკავებისას პროკურორებს არ უთქვამთ, თუ რომელი ქვეყნის სასარგებლოდ ჯაშუშობაში იყო იგი ეჭვმიტანილი.
• თუმცა მათ აღნიშნეს, რომ მისმა სავარაუდო თანამზრახველმა, დ.-მ, რომელიც ჰანინგის აპარატის უფროსად მუშაობდა და 2026 წლის მარტამდე BND-ის მაღალჩინოსნად რჩებოდა, მას ათწლეულზე მეტი ხნის განმავლობაში, ფულის სანაცვლოდ ათასობით საიდუმლო დოკუმენტი მიაწოდა. გამოძიების ფარგლებში ჩხრეკა ჩატარდა როგორც ჰანინგის, ასევე მისი სავარაუდო თანამზრახველის სახლებში.

ჩაშლილად: დ.-ს, რომელიც BND-ის ხელმძღვანელობისას ჰანინგის აპარატის უფროსი იყო, ხოლო 2012 წლიდან 2026 წლამდე BND-ის შემდგომი ხელმძღვანელების აპარატის უფროსის თანამდებობას იკავებდა, თავისი პოზიციიდან გამომდინარე ჰქონდა წვდომა იმ საიდუმლო ინფორმაციაზე, რომელიც მან სავარაუდოდ ჰანინგს გადასცა.

• პროკურორებმა განაცხადეს, რომ ორ პირს შორის შეთანხმება ჯერ კიდევ 2010 წლის გაზაფხულზე შედგა, რომლის მიხედვითაც დ. ჰანინგს ანაზღაურების სანაცვლოდ რეგულარულად მიაწვდიდა BND-ის ღირებულ სადაზვერვო მონაცემებს.
• "მონაცემები მიუთითებს იმაზე, რომ წლების განმავლობაში მანფრედ დ.-მ ჰანინგს დაახლოებით 2 000 დოკუმენტი გადასცა. მათგან ბევრი შეიცავდა საიდუმლო ინფორმაციას, რომელიც განკუთვნილი იყო მხოლოდ ფედერალური დაზვერვის სამსახურის შიდა მოხმარებისთვის, განსაკუთრებით კი სააგენტოს მაღალჩინოსანთა სადაზვერვო ბრიფინგებისთვის," - განაცხადეს პროკურორებმა სამშაბათს დილით.

დიდი სურათი: პროკურორებმა ასევე აღნიშნეს, რომ ჰანინგი საიდუმლო ინფორმაციას კომპანიებისთვის უსაფრთხოების კონსულტანტად მუშაობისას იყენებდა.

• გერმანულმა გაზეთმა Bild-მა სამშაბათს დილით გავრცელებულ სტატიაში აღნიშნა, რომ ჰანინგი მუშაობდა კონსულტანტად მსოფლიოს მასშტაბით სხვადასხვა ბიზნესებისთვის და ასევე ცნობილი იყო მისი კავშირები რუსეთსა და ჩინეთთან, მათ შორის ამ ქვეყნების სამთავრობო სააგენტოებთან. გაზეთის ცნობით, მას სავარაუდოდ კრემლთანაც ჰქონდა კავშირები.
• მისი დაკავების პარალელურად, რამდენიმე გერმანულმა მედიასაშუალებამ, მათ შორის საზოგადოებრივმა მაუწყებელმა, გამოაქვეყნა ერთობლივი გამოძიება, სადაც ნათქვამია, რომ დაკავებული თანაშემწე ჰანინგს საიდუმლო ინფორმაციას სულ მცირე 2022 წლის ბოლომდე გადასცემდა.
• გამომძიებლები იკვლევენ, რომ სულ მცირე ერთ შემთხვევაში ჰანინგმა ინფორმაცია გამოიყენა უცხოური დაზვერვის სამსახურისთვის "უსაფრთხოების ანალიზის" ჩასატარებლად. ანალიზი არ უკავშირდებოდა რუსეთს, ხოლო Der Spiegel-ის ბოლო ცნობა მიუთითებს, რომ იგი მომზადდა აზერბაიჯანელი აგენტისთვის.