ახალი ამბები

რატომ არის მნიშვნელოვანი: The Insider-ის ინფორმაციით, დაზვერვის სამსახურიდან (BND) წასვლის შემდეგ, 2015-2019 წლებში აუგუსტ ჰანინგი რუსეთში მინიმუმ 7-ჯერ იმყოფებოდა.

• გამოცემის ცნობით, ზოგიერთი ვიზიტი 24 საათზე ნაკლებს გრძელდებოდა.
• მაგალითად, 2016 წლის ზაფხულსა და 2019 წლის მაისში, ჰანინგი გერმანიიდან მოსკოვში საღამოს ჩადიოდა და მეორე დღესვე უკან ბრუნდებოდა.

დაეწიე ამბავს: გერმანული მედიის ცნობით, 80 წლის ჰანინგი ნიდერლანდების საზღვრის მახლობლად, საკუთარ სახლში დააკავეს.

• ფედერალური პროკურატურის განცხადებით, მას ბრალად ედება სახელმწიფო საიდუმლოების უცხო ქვეყნისთვის მიყიდვა.
  
• აუგუსტ ჰანინგი გერმანიის დაზვერვის სამსახურს 1998-2005 წლებში ხელმძღვანელობდა.

ჩაშლილად: ჰანინგის გარდა, დაკავებულია BND-ის კიდევ ერთი ყოფილი მაღალჩინოსანი (იდენტიფიცირებულია, როგორც Manfred D), რომელსაც ღალატის ხელშეწყობაში ედება ბრალი.

• პროკურატურის ცნობით, მანფრედ დ. ჰანინგის აპარატის უფროსი იყო.
• ამ პოსტს ის 2012-2016 წლებშიც იკავებდა, რაც იმას ნიშნავს, რომ იგი გერმანიის დაზვერვის სამსახურის ერთ-ერთი ყველაზე გამოცდილი და გავლენიანი ფიგურაა.
• "2010 წლის გაზაფხულზე ეჭვმიტანილებმა მოაწყვეს შეთქმულება, რომლის ფარგლებშიც შეთანხმდნენ, რომ ფინანსური ანაზღაურების სანაცვლოდ, მანფრედ დ. ჰანინგისთვის სახელმწიფო საიდუმლოების გადაცემას გააგრძელებდა", - ნათქვამია განცხადებაში.

დეტალები: პროკურატურის ინფორმაციით, წლების განმავლობაში ჰანინგმა ყოფილი კოლეგისგან 2 000-ზე მეტი საიდუმლო დოკუმენტი მიიღო.

• ამ ინფორმაციაზე დაყრდნობით, ის უცხო ქვეყნის დაზვერვის ოფიცრისთვის საგანგებო ბრიფინგებს აწყობდა.
• წყაროების ცნობით, ჯერჯერობით არ არსებობს მტკიცებულება, რომელიც ეჭვმიტანილების რუსეთთან კავშირს დაადასტურებს.