ახალი ამბები

რუსი ოპოზიციონერი და მსოფლიოს ყოფილი ჩემპიონი ჭადრაკში, გარი კასპაროვი აცხადებს, რომ აშშ-ისა და ლიეტუვის სპეცსამსახურებმა მოსალოდნელი საფრთხის შესახებ რუსი ოპოზიციონერები გააფრთხილეს.

რა თქვა: კასპაროვმა თავის ბლოგში დაწერა, რომ არ ჰქონდათ ინფორმაცია იმის შესახებ, რომ ის თავდასხმის კონკრეტული სამიზნე იყო.

• "მიუხედავად ამისა, ლიეტუვისა და აშშ-ის სპეცსამსახურებმა გაგვაფრთხილეს, რომ ჩვენი სიცოცხლე საფრთხეშია და სიფრთხილის ზომები უნდა მივიღოთ". - დაწერა მან.
• "მაგრამ მე არ გავჩერდები და არ დავიმალები". - დასძინა კასპაროვმა.

კონტექსტი: ცოტა ხნით ადრე ცნობილი გახდა, რომ რუსული სპეცსამსახურები უცხოეთში მცხოვრები რუსი ოპოზიციონერების ლიკვიდაციას გეგმავდნენ.

• სექტემბერში აშშ-ის იუსტიციის სამინისტრომ განაცხადა ხუთი ადამიანისგან შემდგარი ჯგუფის არსებობის შესახებ, რომლებიც, სავარაუდოდ, რუსეთის სპეცსამსახურების მითითებით მოქმედებდნენ და ოპოზიციონერების მკვლელობას გეგმავდნენ.
• ოთხშაბათს ესპანურმა გამოცემა El Mundo-მ გამოაქვეყნა გამოძიება, რომელშიც სავარაუდო სამიზნეებად დასახელდნენ კასპაროვი, პოლიტიკოსი ილია პონომარიოვი და აქტივისტი ივან ტიუტრინი.
• კრემლში აცხადებდნენ, რომ აშშ-ის ბრალდებების კომენტირების საფუძველს ვერ ხედავენ, რადგან არ არსებობს სანდო მტკიცებულებები და ფაქტები.