19 ოქტომბერს კენიელი მქადაგებელი პოლ მაკენზი 190 ბავშვისა და ერთი ზრდასრულის მკვლელობაში ცნეს დამნაშავედ. ის თავისი სექტის წევრებს ბავშვების შიმშილით დახოცვას უბრძანებდა.
მაკენზისთან ერთად მკვლელობებში მისი 29 თანამზრახველიც იქნა ცნობილი დამნაშავედ. სექტის წევრებს განაჩენს ნოემბერში გამოუტანენ.
ვითარების არსი: სასამართლოში მაკენზი და მისი მიმდევრები ამტკიცებდნენ, რომ არავინ მოუკლავთ და სიკვდილისთვის არ გაუწირიათ.
- თუმცა, გამოძიებამ და სასამართლომ დაასკვნა, რომ სექტაში ადამიანებს არა მხოლოდ აშიმშილებდნენ, არამედ ახრჩობდნენ და სასტიკადაც სცემდნენ.
- "ადამიანებმა თავი შიმშილით მოიკლეს იესოსთან შესახვედრად". - ამბობს მაკენზი.
- სულ შაკახოლის ტყეში, ინდოეთის ოკეანის სანაპიროსთან ახლოს, სადაც სექტის ბანაკი მდებარეობდა, სამი წლის წინ 400-ზე მეტი ცხედარი იპოვეს.
წინარე ისტორია: პოლ მაკენზიმ, ნაირობის ყოფილმა ტაქსის მძღოლმა, თავისი სექტა "სახარებისეული კეთილი ამბის მსახურების" 2003 წელს დააარსა. მომდევნო 16 წლის განმავლობაში სექტა გაიზარდა, მას ათასობით მიმდევარი და ფილიალი გაუჩნდა მთელ კენიაში.
- "კეთილ ამბავს" საკუთარი ტელეარხი Times TV-ც კი ჰქონდა, რომელიც ინდოეთის ოკეანის სანაპიროზე მდებარე ქალაქ მალინდიდან მაუწყებლობდა და მაკენზის ქადაგებებს გადასცემდა.
- 2019 წელს მაკენზიმ სექტის მთავარი განყოფილება დახურა და მრევლთან ერთად შაკახოლის ტყეში გადასახლდა, რომელიც მალინდიდან დაახლოებით 70 კილომეტრში მდებარეობს.
- წლების განმავლობაში მაკენზი მრევლის ბავშვებს შიმშილით კლავდა და მათ არწმუნებდა, რომ ასე უფრო სწრაფად "შეხვდებოდნენ იესოს".
- გარდა ამისა, ის ქადაგებდა, რომ თანამედროვე განათლება და მედიცინა ბოროტებაა.
- მაკენზის ერთ-ერთი თანამზრახველის თქმით, ის აცხადებდა, რომ ყველა, ვინც "მარხვის ბრძანებას ეწინააღმდეგება, ცემით უნდა გაისტუმრონ ზეცაში".
- ტყეში არსებულ არა ღრმა საფლავებში დაკრძალვას სექტაში "ქრისტესთან ქორწილს" უწოდებდნენ.
ჩაშლილად: მკვლელობების გარდა, მაკენზისა და სექტის სხვა ლიდერებს ბრალად ედებათ ტერორიზმი, მრევლის რადიკალიზაცია და ბავშვებისთვის განათლების უფლების ჩამორთმევა.
- ისინი 2023 წელს დააპატიმრეს მას შემდეგ, რაც შაკახოლის ტყეში ასობით ცხედარი იპოვეს. ცხედრების ექსგუმაციისა და გამოტანისთვის 17 ადგილობრივი მცხოვრები დაიქირავეს.
- "იქ რამდენიმე კვირის ასაკის ბავშვების ნაშთებიც იყო. ერთ საფლავში ერთდროულად 12 ბავშვის ცხედარი ვიპოვეთ". - იხსენებს ერთ-ერთი ადგილობრივი მაცხოვრებელი.
- მრავალი იმ ასეულობით ადამიანიდან, რომლებიც იქ მომდევნო ოთხი წლის განმავლობაში დაიღუპნენ, დღემდე ყველა იდენტიფიცირებული არ არის, რადგან მათი ცხედრები ძლიერ არის გახრწნილი.
დაკავშირებული თეგები
