ახალი ამბები

ამავე დროს, Axios-ის ცნობით, ამერიკელი ოფიციალური პირები აცხადებენ, რომ ბოლო კვირებში რუსეთმა და უკრაინამ დახურულ კონტაქტებში ტერიტორიულ საკითხზე გარკვეული მოქნილობა გამოავლინა.

• The Economist-ის წყაროების თანახმად, მოსკოვი საბრძოლო მოქმედებების ფრონტის ამჟამინდელ ხაზზე შეჩერების განხილვისთვისაც მზადყოფნას გამოთქვამს.
• თუმცა ეს წყაროების შეფასებებია - რუსეთს საკუთარი ძირითადი ტერიტორიული მოთხოვნები საჯაროდ არ შეუცვლია.

უკრაინის პოზიცია: კიევი ტერიტორიული გამიჯვნის საფუძვლად ფრონტის ამჟამინდელ ხაზს განიხილავს. ვოლოდიმირ ზელენსკის განცხადებით, ტერიტორიულ საკითხებზე გადაწყვეტილებების მიღება მხოლოდ სახელმწიფოთა ლიდერების შეხვედრაზეა შესაძლებელი.

• Axios-ის ცნობით, ამერიკელი ოფიციალური პირები მიიჩნევენ, რომ ტერიტორიულ შეთანხმებამდე აუცილებელია უკრაინის ომისშემდგომი უსაფრთხოების გარანტიებზე შეთანხმება.

კიევის პრიორიტეტებს შორისაა:

• საბრძოლო მოქმედებების ინტენსივობის შემცირება და ენერგეტიკულ ობიექტებზე დარტყმების შეჩერება;

• შავ ზღვაში უსაფრთხო ნაოსნობისა და მარცვლეულის ექსპორტის უზრუნველყოფა;

• სამხედრო ტყვეების გაცვლა;

• ტრამპის, ზელენსკისა და პუტინის სამმხრივი შეხვედრის ორგანიზება.

უსაფრთხოების გარანტიები: The Economist-ის თანახმად, უკრაინა ომის დასრულებას უსაფრთხოების მყარი გარანტიების გარეშე არ დათანხმდება.

• Financial Times-ის ცნობით, ვაშინგტონი მოსკოვის პოზიციით დაინტერესდა უკრაინისთვის NATO-ს მე-5 მუხლის მსგავსი ამერიკული უსაფრთხოების გარანტიებისა და ალიანსის მხრიდან ანალოგიური ვალდებულებების შესახებ.

• The Economist-ის თანახმად, ამერიკელი მომლაპარაკებლები ვარაუდობენ, რომ პუტინი შესაძლოა NATO-ს მე-4 ან მე-5 მუხლის მსგავსი გარანტიების მიღებას დათანხმდეს.

• მე-4 მუხლი საფრთხის შემთხვევაში მოკავშირეებს შორის კონსულტაციებს ითვალისწინებს, ხოლო მე-5 მუხლი - თავდასხმის შემთხვევაში კოლექტიურ თავდაცვას.

• თუმცა კიევში ეჭვი ეპარებათ, რამდენად შეასრულებს ტრამპი ასეთ ვალდებულებებს.

• მოსკოვი კვლავ ეწინააღმდეგება უკრაინაში მრავალეროვნული სამხედრო ძალების განთავსებას და მოითხოვს ქვეყნის ნეიტრალიტეტსა და მისი შეიარაღებული ძალების შემცირებას.

The Economist-ის ცნობით, კიევი ომის დასრულების შემდეგ სულ მცირეა ათი წლის განმავლობაში ფართომასშტაბიანი ფინანსური და სამხედრო მხარდაჭერის გარანტიებს ითხოვს.

უკრაინის მოთხოვნები მოიცავს:

• არანაკლებ 800-ათასკაციანი არმიის შესანარჩუნებლად საჭირო დაფინანსებას;

• ომით მიყენებული ზიანის ანაზღაურებასა და ქვეყნის აღდგენას;

• ვეტერანებისა და მათი ოჯახების მხარდაჭერას.

• ამერიკელი მომლაპარაკებლები ასეთ დახმარებას ზედმეტად ძვირად მიიჩნევენ და ფიქრობენ, რომ აშშ-ის მიერ შეთავაზებული უსაფრთხოების გარანტიები საკმარისი უნდა იყოს.
• ამასთან, უცნობია, დათანხმდებიან თუ არა ევროპული ქვეყნები ამ მასშტაბის ხანგრძლივი დაფინანსების უზრუნველყოფას.

The Economist-ის ცნობით, ამერიკული მხარის კიდევ ერთი შეთავაზება რუსეთის ევროპულ ენერგეტიკულ ბაზარზე დაბრუნების შესაძლებლობას ეხება.

• გამოცემის თანახმად, ეს წინადადება ევროკავშირის ახალ კანონმდებლობას ეწინააღმდეგება.

• უკრაინა და მისი ევროპელი პარტნიორები იდეას არ ეთანხმებიან. უკრაინელი ოფიციალური პირის განცხადებით, კიევი ასეთ შეთანხმებას არ მიიღებს, ვიდრე ომი გრძელდება.

დიდი სურათი: The Economist-ის თანახმად, მოსკოვმა ტერიტორიულ საკითხზე უჩვეულო მოქნილობა მას შემდეგ გამოავლინა, რაც აშშ-მა მოლაპარაკებების დღის წესრიგში ევროპის მომავალი უსაფრთხოების სისტემის განხილვა შეიტანა.

• უკრაინელი და ევროპელი ოფიციალური პირები შიშობენ, რომ ამან შესაძლოა რუსეთს ახალი, მიუღებელი მოთხოვნების წამოყენებისა და მოლაპარაკებების გაჭიანურების საშუალება მისცეს.

• კიევისა და მისი ევროპელი პარტნიორების პოზიციით, ჯერ საბრძოლო მოქმედებები უნდა შეწყდეს და მხოლოდ ამის შემდეგ დაიწყოს ევროპის უსაფრთხოების სისტემაზე მსჯელობა.

• ამერიკელი მომლაპარაკებლები ამ თანმიმდევრობას არ ეთანხმებიან და ომის დასრულებას ევროპის უსაფრთხოების საკითხებზე უფრო ფართო შეთანხმებას უკავშირებენ.

• The Economist-ის ერთ-ერთი წყაროს თანახმად, უსაფრთხოების ახალი სისტემის შესაძლო საფუძვლად NATO-რუსეთის საბჭოს განახლებული მოდელიც განიხილება.

Politico-ს ცნობით, ტრამპის წარმომადგენლები, სტივ უიტკოფი და ჯარედ კუშნერი, ცდილობენ, მოსკოვი მოლაპარაკებების მომდევნო რაუნდში ევროპული ქვეყნების მონაწილეობაზე დაითანხმონ.

• ვაშინგტონს სურს, აბუ-დაბის შეხვედრა ბოლო იყოს, რომელიც ევროპის სრულფასოვანი მონაწილეობის გარეშე გაიმართება.

• დიდი ბრიტანეთის, საფრანგეთის, გერმანიის, იტალიის, NATO-სა და ევროკავშირის წარმომადგენლები აბუ-დაბიში იმყოფებიან და ამერიკულ და უკრაინულ მხარეებთან ცალკე კონსულტაციებს მართავენ, თუმცა სამმხრივ მოლაპარაკებებში არ მონაწილეობენ.

• ევროპული ქვეყნები შიშობენ, რომ მოსკოვთან ახალმა შეთანხმებებმა შესაძლოა NATO-ს როლი შეასუსტოს და რუსეთს ევროპის უსაფრთხოებაზე დამატებითი გავლენა მისცეს.

• ამერიკელი ოფიციალური პირები ამტკიცებენ, რომ ნებისმიერი შეთანხმება სახელმწიფოების სუვერენიტეტს პატივს სცემს, NATO კი ევროპის კოლექტიური თავდაცვის მთავარ საფუძვლად დარჩება.

• Financial Times-ის ცნობით, ევროპელი ოფიციალური პირები მზად არიან, განიხილონ სამხედრო ესკალაციის თავიდან აცილების ძველი მექანიზმების აღდგენა, მათ შორის "ღია ცის ხელშეკრულების" მსგავსი შეთანხმებები.

მთავარი უთანხმოება უცვლელია: რუსეთი დამატებით ტერიტორიულ დათმობებს მოითხოვს, უკრაინა კი უსაფრთხოების მყარ გარანტიებს.

• პარალელურად, აშშ ცდილობს, ომის დასრულება ევროპის მომავალი უსაფრთხოების სისტემის შესახებ ფართო შეთანხმებას დაუკავშიროს, რასაც უკრაინა და მისი ევროპელი პარტნიორები სიფრთხილით ეკიდებიან.

კონტექსტი: Financial Times-ის წყაროების თანახმად, პუტინი მიმდინარე ზამთარს უკრაინის დასასუსტებლად ხელსაყრელ პერიოდად მიიჩნევს, განსაკუთრებით ქვეყნის ინფრასტრუქტურაზე დარტყმების გზით.

• The Economist-ის ცნობით, კიევში არ ელიან, რომ რუსეთის პრეზიდენტი ზამთრის სამხედრო კამპანიის დასრულებამდე ყოვლისმომცველ სამშვიდობო შეთანხმებას მოაწერს ხელს.