ახალი ამბები

სტრატეგიული და საერთაშორისო კვლევების ცენტრის (CSIS) ახალი კვლევის თანახმად, წელს რუსული არმიის დანაკარგების შეფარდებამ უკრაინულთან 8:1-ს მიაღწია.

წინა წლებში ეს მაჩვენებელი 3:1-ზე იყო. ომის დაწყებიდან დღემდე, რუსეთმა მოკლულების, დაჭრილებისა და გაუჩინარებულების სახით, ჯამში, დაახლოებით 1,4 მილიონი ადამიანი დაკარგა.

ვითარების არის: ცენტრის შეფასებით, დანაკარგების პროპორციული თანაფარდობის მკვეთრი ცვლილება უკრაინის მიერ დრონების, მათ შორის ხელოვნური ინტელექტის მქონე უპილოტო საფრენი აპარატების გამოყენებას უკავშირდება.

• კვლევაში აღნიშნულია, რომ ზოგიერთი შეფასებით, რუსეთის დანაკარგების 90%-ზე მეტი სწორედ დრონების დარტყმებზე მოდის.
• კვლევაში რუსული არმიის დიდი დანაკარგების სხვა მიზეზებად სახელდება: რუსეთის საბრძოლო სტრატეგია, რუსეთის შეიარაღებული ძალების უუნარობა, ეფექტიანად მოახდინონ კოორდინაცია სხვადასხვა შენაერთებს შორის საბრძოლო მოქმედებების დროს, ცუდი ტაქტიკა და მომზადება, კორუფცია და დაბალი მორალური სულისკვეთება.
• მკვლევართა აზრით, დანაკარგების რაოდენობაზე გავლენა შესაძლოა მოეხდინა რუსი სამხედროებისთვის Starlink-ის ტერმინალების გათიშვასაც.

ფართო ხედით: 2026 წელს რუსეთი ბრძოლის ველზე ყოველთვიურად დაახლოებით 30-34 ათას ადამიანს კარგავდა, რაც აღემატება ყოველთვიურად მოხალისედ ჩაწერილ 27 ათას ადამიანს, მოწმობს CSIS-ის გათვლები.

• ომის დაწყებიდან დღემდე, რუსეთის საერთო დანაკარგებიდან დაახლოებით 450 ათასი დაღუპულია.
• უკრაინული არმიის ჯამურმა დანაკარგებმა ომის დაწყებიდან 525-დან 625 ათასამდე ადამიანი შეადგინა. CSIS-ის მიხედვით, მათგან 125-დან 150 ათასამდე დაიღუპა.
• დანაკარგების შეფასებისას CSIS ეყრდნობა დიდი ბრიტანეთის თავდაცვის სამინისტროს მონაცემებს, გამოცემების - "მედიაზონასა" და "ბი-ბი-სის რუსული სამსახურის" შეფასებებს, ასევე ინტერვიუებს ამერიკელ, ევროპელ, უკრაინელ და სხვა ოფიციალურ პირებთან.
• დაღუპულ რუს სამხედროთა სახელობით სიაში, რომელსაც "მედიაზონა" და "ბი-ბი-სის რუსული სამსახური" აწარმოებენ, ოთხშაბათის მონაცემებით 227,7 ათასი ადამიანი ფიქსირდებოდა.
• 2026 წლის იანვარში CSIS რუსეთის დანაკარგებს ომის დაწყებიდან 1.2 მილიონ ადამიანად აფასებდა (აქედან 325 ათასი დაღუპული), ხოლო უკრაინისას 500 - 600 ათას ადამიანად (აქედან 100-დან 140 ათასამდე დაღუპული).
• რუსეთისა და უკრაინის დანაკარგების შეფარდება მაშინ 2.5:1-ზე ფასდებოდა.

დიდი სურათი: უკრაინაში დაღუპულთა რაოდენობა 28-ზე მეტჯერ აღემატება 1980-იან წლებში ავღანეთში დაღუპული საბჭოთა სამხედროების რაოდენობას.

• 18-ჯერ აღემატება ჩეჩნეთის პირველი და მეორე ომების დროს დაღუპულთა რიცხვს და 9-ჯერ აჭარბებს მეორე მსოფლიო ომის შემდეგ, რუსეთისა და საბჭოთა კავშირის მიერ წარმოებულ ყველა ომში ერთად აღებულ დაღუპულთა რაოდენობას.