ახალი ამბები

საფრანგეთის საპრეზიდენტო არჩევნებში ულტრამემარჯვენე პარტია "ეროვნული გაერთიანების" გამარჯვების შემთხვევაში, ლე პენი ბრიტანეთის ევროკავშირში დაბრუნებას დაბლოკავს, თუ ლონდონი ამ საკითხზე ახალ რეფერენდუმს არ ჩაატარებს.

ვითარების არსი: The Telegraph-ის ცნობით, ბრიტანეთის ლეიბორისტული პარტიის ლიდერობის კანდიდატები უშვებენ Brexit-ის, ანუ ევროკავშირიდან ქვეყნის გამოსვლის გადაწყვეტილების გაუქმების ალბათობას მომავალი არჩევნების შემდეგ.

• თუმცა, ევროკავშირში ახალი ქვეყნის მისაღებად საჭიროა წევრი 27-ვე სახელმწიფოს თანხმობა და თითოეულ მათგანს ვეტოს უფლება აქვს.
• საფრანგეთში მომავალი წლის საპრეზიდენტო არჩევნების ერთ-ერთი ფავორიტია ჯორდან ბარდელა - მემარჯვენე ევროსკეპტიკური პარტია "ეროვნული გაერთიანების" ლიდერი და მარინ ლე პენის პოლიტიკური თანამებრძოლი.
  

სტრიქონებს შორის: ბარდელას ეკონომიკურმა მრჩეველმა, ევროპარლამენტარმა შარლ-ანრი გალუამ გამოცემას განუცხადა, რომ პარტიამ შესაძლოა მხარი არ დაუჭიროს ბრიტანეთის ევროკავშირში დაბრუნებას განმეორებითი რეფერენდუმის გარეშე.

• მისი თქმით, დაბრუნება ახალი კენჭისყრის გარეშე "დემოკრატიის უარყოფა" იქნება, რადგან ბრიტანელებმა მანამდე რეფერენდუმზე მხარი დაუჭირეს ევროკავშირიდან გამოსვლას. გალუამ ასევე ხაზგასმით აღნიშნა, რომ "ეროვნული გაერთიანება," ზოგადად, ევროკავშირის გაფართოების წინააღმდეგია.

დიდი სურათი: თუ ბრიტანეთი ევროკავშირში დაბრუნებაზე განაცხადს შეიტანს, მას ელის ხანგრძლივი მოლაპარაკებები გაწევრიანების შესახებ, ხოლო ევროკომისია, სავარაუდოდ, ლონდონს მოსთხოვს უარი თქვას იმ გამონაკლისებზე, რომლებითაც ქვეყანა Brexit-მდე სარგებლობდა.

• ბრიტანეთის ევროკავშირიდან გამოსვლის შესახებ რეფერენდუმი 2016 წლის ივნისში ჩატარდა. ბრიტანელების 51.9%-მა ხმა მისცა ქვეყნის კავშირიდან გამოსვლას, ხოლო 48.1%-ს ევროკავშირში დარჩენა სურდა.
• ევროკავშირიდან გამოსვლის ოფიციალური პროცედურა 2017 წლის 29 მარტს დაიწყო.
• 2019 წლის დეკემბერში გაერთიანებული სამეფოს თემთა პალატამ მხარი დაუჭირა შეთანხმებას Brexit-ის შესახებ, რომლის მიხედვითაც ქვეყანას ევროპული კავშირი 2020 წლის 31 იანვარს უნდა დაეტოვებინა. 23 იანვარს ქვეყნის ევროკავშირიდან გამოსვლის შესახებ კანონს ხელი დედოფალმა ელისაბედ II-მ მოაწერა.