ულტრამემარჯვენე პარტია "ეროვნული გაერთიანების" პრეზიდენტობის კანდიდატმა, მარინ ლე პენმა საფრანგეთში უკრაინის ელჩს, ვადიმ ომელჩენკოს დაუდასტურა, რომ 2027 წლის საპრეზიდენტო არჩევნებში გამარჯვების შემთხვევაში უკრაინისთვის ფინანსური დახმარების შეწყვეტას გეგმავს. ამ ინფორმაციას Le Monde ავრცელებს.
ვითარების არსი: "საფრანგეთის საჯარო ფინანსების მდგომარეობა ჩვენს ქვეყანას აღარ აძლევს საშუალებას, მომდევნო თვეებში უკრაინას ფინანსური დახმარება გაუწიოს," - განაცხადა ლე პენმა შეხვედრის დროს.
- ემანუელ მაკრონის პრეზიდენტობის პირობებში საფრანგეთი უკრაინის ერთ-ერთი მთავარი სამხედრო და ფინანსური დონორია.
- საფრანგეთის 2027 წლის საპრეზიდენტო არჩევნების წინასაარჩევნო გამოკითხვებში ლე პენი ლიდერობს, ხოლო უკრაინისა და რუსეთის შესახებ მისი პოზიცია საარჩევნო კამპანიის ერთ-ერთ მთავარ საკითხად იქცა.
- მიუხედავად იმისა, რომ მას უკრაინისთვის ფინანსური დახმარების შეწყვეტა სურს, ლე პენმა ომელჩენკოს განუცხადა, რომ შეასრულებს უკრაინის წინაშე უკვე აღებულ ვალდებულებებს, მათ შორის იმ ვალდებულებებს, რომლებიც ევროკავშირის 90 მილიარდი ევროს ოდენობის სესხს უკავშირდება.
სტრიქონებს შორის: უკრაინის მხარდაჭერის 90 მილიარდი ევროს მოცულობის სესხი გადამწყვეტია როგორც უკრაინის საომარი ძალისხმევის პირდაპირი მხარდაჭერისთვის, ისე ქვეყნის სახელმწიფო ბიუჯეტის დასაფინანსებლად.
- მოსალოდნელია, რომ ის 2026 და 2027 წლებში უკრაინის საერთო საჭიროებების ორ მესამედს დაფარავს.
- კილის მსოფლიო ეკონომიკის ინსტიტუტის შეფასებით, 2022 წლიდან უკრაინის მხარდასაჭერად საფრანგეთის საერთო კონტრიბუციამ - ორმხრივი დახმარების, ევროკავშირის დაფინანსების, სამხედრო, ფინანსური და ჰუმანიტარული დახმარების ჩათვლით - დაახლოებით 27 მილიარდი ევრო შეადგინა.
- 7 ოქტომბერს ლე პენმა უკრაინის ევროკავშირში გაწევრიანების საწინააღმდეგო განცხადება გააკეთა და აღნიშნა, რომ უკრაინის სოფლის მეურნეობის სექტორი საფრანგეთის სოფლის მეურნეობას გაანადგურებდა.
დიდი სურათი: 2022 წლამდე ლე პენი აცხადებდა, რომ რუსეთის მიერ ყირიმის ოკუპაცია უკანონო არ ყოფილა, მისმა პარტიამ კი სესხი რუსული ბანკიდან აიღო. თუმცა მას შემდეგ, რაც მოსკოვმა უკრაინაში სრულმასშტაბიანი შეჭრა დაიწყო, მან პოზიცია შეიცვლა.
- ლე პენმა დაგმო რუსული აგრესია და მხარი დაუჭირა უკრაინისთვის სამხედრო დახმარების გაგრძელებას, მაშინაც კი, როცა პარიზის მხრიდან ფინანსური დახმარების შეკვეცას მოითხოვს.
- ამავდროულად, ის ეწინააღმდეგება კიევის ევროკავშირში გაწევრიანებას და სკეპტიკურად უყურებს ევროკავშირის სამომავლო დახმარებას, თუ ეს საფრანგეთს ტვირთად დააწვება.