ახალი ამბები

ნორვეგიის მთავრობამ კვირას განაცხადა, რომ 2027 წელს უკრაინას 85 მილიარდი ნორვეგიული კრონის ($9.2 მილიარდი - რედ.) ფინანსურ მხარდაჭერას გამოუყოფს.

ვითარების არსი: ნორვეგიის პრემიერ-მინისტრმა იონას გარ სტიორემ კიევში, უკრაინის პრეზიდენტ ვოლოდიმირ ზელენსკისთან შეხვედრისას აღნიშნა, რომ მთავრობა დაფინანსების მოთხოვნას დამტკიცების მიზნით ნორვეგიის პარლამენტს ოფიციალურად წარუდგენს.

• "უკრაინის მხარდაჭერა და აღდგენა ასევე მნიშვნელოვანია ევროპული უსაფრთხოებისთვის. ამიტომ, მთავრობა გამოდის ინიციატივით, რომ მომავალ წელს გაგრძელდეს გადაუდებელი მხარდაჭერა 85 მილიარდი კრონის ოდენობით." - აღნიშნა სტიორემ.
• ეს ფინანსური დახმარება უკრაინისთვის ნანსენის მხარდაჭერის პროგრამის (Nansen Support Programme) ფარგლებში გაიცემა, რომელიც თანხებს როგორც სამოქალაქო, ისე სამხედრო მიზნებისთვის გამოყოფს.

სტრიქონებს შორის: ნორვეგიის მთავრობის განცხადების თანახმად, 2027 წლის დახმარების პაკეტი ძირითადად სამხედრო მხარდაჭერაზე გამოიყოფა, რაც მოიცავს შეიარაღების პირდაპირ შესყიდვას უკრაინის თავდაცვითი ინდუსტრიისგან.

• მაისში ნორვეგიამ აიღო ვალდებულება, დამატებით 2.8 მილიარდი კრონი ($302 მილიონი) გამოეყო ნატოს უკრაინის პრიორიტეტული მოთხოვნების სიის (PURL) ინიციატივისთვის - მექანიზმისთვის, რომლითაც უკრაინის ევროპელი მოკავშირეების ფინანსური რესურსების გაერთიანებით სამხედრო ტექნიკის შესყიდვის კოორდინაცია ხდება.
• ამ შენატანით, PURL-ის პროგრამაში ნორვეგიის საერთო კონტრიბუციამ 12.5 მილიარდ კრონს ($1.35 მილიარდი) გადააჭარბა. 

დიდი სურათი: 2022 წელს უკრაინაში რუსეთის შეჭრის შემდეგ, ნორვეგია კიევის ერთ-ერთ ყველაზე ძლიერ ევროპელ მხარდამჭერად იქცა, რომელიც უკრაინას აწვდის საჰაერო თავდაცვის სისტემებს, საბრძოლო მასალებს, უზრუნველყოფს სწავლებასა და ფართომასშტაბიან გრძელვადიან ფინანსურ დახმარებას.