ახალი ამბები

ვლადიმერ პუტინმა საწვავის კრიზისთან დაკავშირებულ სიტუაციაზე კიდევ ერთხელ გააკეთა კომენტარი.

საკითხის განხილვა მთავრობის წევრებთან გამართულ თათბირზე მოხდა. მის სიტყვებს სამთავრობო სააგენტოები TASS-ი და RIA Novosti ციტირებენ.

ვითარების არსი: "ეს დროებითი ხასიათის მოვლენებია, ეს სრულიად აშკარა რამეებია, ეს ქმედებები მიმართულია შვებულებების სეზონის ჩასაშლელად - ქვეყნის სამხრეთში, მათ შორის ყირიმში, ჩვენი მოქალაქეების დასვენების ჩასაშლელად". - განაცხადა პუტინმა რუსეთში საწვავის დეფიციტზე საუბრისას.

• მისი აზრით, უკრაინა ცდილობს ზიანი მიაყენოს რუსეთის ეკონომიკას და საზოგადოებაში ნერვული ფონი შექმნას.
• "სრულიად აშკარაა, რომ მოწინააღმდეგე მიზნად ისახავს ეკონომიკისთვის ზიანის მიყენებას. თუმცა, რაც ყველაზე მთავარია, ის ცდილობს საზოგადოებაში ნერვული ატმოსფეროს შექმნას". - თქვა პუტინმა.
• მან მთავრობა დაარწმუნა, რომ ეს შეუსრულებელი ამოცანაა, ვინაიდან რუსულ ენერგოსისტემას არაფერი ემუქრება.
• "რუსეთის ენერგოსისტემის სიმტკიცის დონე ძალიან მაღალია, ერთ-ერთი უმაღლესი მსოფლიოში". — აღნიშნა პუტინმა.
• კრიზისის შედეგების შესამცირებლად, მსხვილმა ნავთობკომპანიებმა საწვავი დამოუკიდებელ ავტოგასამართ სადგურებსაც უნდა მიაწოდონ, მიიჩნევს პუტინი. მან მთავრობას მოუწოდა, ორგანიზება გაუკეთოს სახელმწიფო ენერგეტიკულ კომპანიებთან მუშაობას.
• "საჭიროა უბრალოდ მუშაობის ორგანიზება ვერტიკალურად ინტეგრირებულ კომპანიებთან ერთად". - თქვა რუსეთის პრეზიდენტმა.
• პუტინმა ასევე გაკიცხა ვიცე-პრემიერი ალექსანდრე ნოვაკი, რომელმაც ყირიმის საწვავით უზრუნველყოფის საკითხზე კომენტირებისას თქვა, რომ ხელისუფლება "მზად არის განიხილოს" ეს სიტუაცია ნახევარკუნძულელ კოლეგებთან ერთად.
• "არა უბრალოდ "მზად ვართ განვიხილოთ", არამედ განვიხილოთ და მივიღოთ გადაწყვეტილება რაც შეიძლება სწრაფად. გაჭიანურება საჭირო არ არის". - მიმართა პუტინმა ნოვაკს.
• მან დაამატა, რომ სახელმწიფო სტრუქტურების საწვავით მომარაგება აუცილებელია, თუმცა ისე, რომ მოქალაქეებმა თავი დაჩაგრულად არ იგრძნონ.

კონტექსტი: რუსეთი საწვავის დეფიციტს გაზაფხულის ბოლოს მას შემდეგ შეეჯახა, რაც უკრაინის შეიარაღებულმა ძალებმა დრონებით ნავთობგადამამუშავებელ ქარხნებზე წარმატებული იერიშები მიიტანა.

• საწვავის კრიზისის ფონზე, როდესაც მთელ რუსეთში ბენზინისა და დიზელის გაყიდვაზე შეზღუდვები წესდება, საწვავის ფასი მკვეთრად გაიზარდა.

• ოფიციალური სტატისტიკით, 16-დან 22 ივნისამდე რუსეთში ბენზინი 3%-ით, ხოლო დიზელის საწვავი 2.7%-ით გაძვირდა.

ფართო ხედით: კრემლში დაადასტურეს, რომ უკრაინული დრონების იერიშებით გამოწვეული საწვავის კრიზისის ფონზე, რუსეთი ნავთობპროდუქტების შესაძლო იმპორტზე მოლაპარაკებებს აწარმოებს.

• კრემლის პრესსპიკერის, დმიტრი პესკოვის განცხადებით, ნავთობპროდუქტების იმპორტი შეიძლება გახდეს "კიდევ ერთი ნაბიჯი ბაზრის სტაბილიზაციისკენ", რაც "არსებული აჟიოტაჟური მოთხოვნის ჩაცხრობას" შეუწყობს ხელს.
• საწვავის კრიზისმა რუსეთის ხელისუფლებას უკვე აიძულა ქვეყანაში ბენზინის იმპორტი დაეწყო.
• სავარაუდო მიმწოდებლებს შორის არიან ბელარუსი, ყაზახეთი, ინდოეთი და იაპონია.