ახალი ამბები

სანქტ-პეტერბურგში მთავარი სამხედრო-საზღვაო აღლუმი ზედიზედ მეორედ არ ჩატარდება.

ამის შესახებ გამოცემა „ფონტანკა“ თავდაცვის სამინისტროში საკუთარ წყაროებზე დაყრდნობით იუწყება.

ვითარების არსი: რუსეთის სამხედრო-საზღვაო ფლოტის დღისადმი მიძღვნილი აღლუმი, რომელიც ტრადიციულად ივლისის ბოლო კვირას სანქტ-პეტერბურგსა და კრონშტადტში ტარდებოდა, წელსაც აღარ ჩატარდება.

• გავრცელებული ინფორმაციით, ვლადიმერ პუტინს აღლუმის გამართვის შესახებ შესაბამისი ბრძანებულება არ გამოუცია. თავად ფლოტშიც სამზადისი არ დაუწყიათ, მიუხედავად იმისა, რომ ივნისის შუა რიცხვებისთვის ეს პროცესი უკვე აქტიურ ფაზაში უნდა ყოფილიყო.
• „თავადაც გესმით, ახლა ამის დრო არ არის“ - აღნიშნა გამოცემის წყარომ სამხედრო-საზღვაო ფლოტიდან.

რატომ არის მნიშვნელოვანი: სამხედრო-საზღვაო ფლოტის ყოველწლიური აღლუმი ახალი ტრადიციაა, რომელიც მხოლოდ 2017 წელს დამკვიდრდა. სამხედრო ხომალდებს პუტინი პირადად, მდინარე ნევასა და კრონშტადტის რეიდზე ათვალიერებდა ხოლმე.

• 2024 წელს, უკრაინის წინააღმდეგ მიმდინარე ომში ფლოტის ნაწილის დაკარგვის შემდეგ, ხელისუფლებამ აღლუმის კრონშტადტის ნაწილი გააუქმა, 2025 წელს კი ღონისძიება სრულად ჩაშალა.
• მიუხედავად ამისა, შარშან ვლადიმერ პუტინი საადმირალო უწყებაში მაინც მივიდა, ვიდეოკავშირის საშუალებით ფლოტის სწავლებებს თვალი ადევნა და ნევაზე იმ კატერით გაისეირნა, საიდანაც, როგორც წესი, ხომალდების აღლუმს იბარებს ხოლმე.