ახალი ამბები

როგორც ესპანური გამოცემა El Mundo წერს, რუსეთის სპეცსამსახურები დევნილი რუსი ოპოზიციონერების, გარი კასპაროვისა და ილია პონომარიოვის მოკვლას გეგმავდნენ.

ვითარების არსი: მკვლელობებს რუსეთის სპეცსამსახურების ქსელი ამზადებდა, რომელიც აშშ-ის ხელისუფლებამ სექტემბრის შუა რიცხვებში გახსნა.

• ბოლო თვეებში პონომარიოვმა, კასპაროვმა და "თავისუფალი რუსეთის ფორუმის" ერთ-ერთმა თანადამფუძნებელმა, ივან ტიუტრინმა, აშშ-სა და ლიეტუვის ხელისუფლებისგან მიიღეს გაფრთხილებები მათზე თავდასხმების მომზადების შესახებ.
• El Mundo-ს ცნობით, ამ ქსელის სხვა პოტენციური სამიზნეები იყვნენ ვლადიმერ კარა-მურზა და აქტივისტი ბაშკირეთიდან რუსლან გაბასოვი.

ჩაშლილად: პუბლიკაციის თანახმად, კასპაროვი და პონომარიოვი აშშ-ში, ხოლო მესამე მსხვერპლი ვილნიუსში უნდა მოეკლათ.

• გეგმა ითვალისწინებდა "ერთი-ორი დისიდენტის ლიკვიდაციას და ამავდროულად დანარჩენებისთვის მკაცრი სიგნალის გაგზავნას". - წერს El Mundo.
• ზაფხულში აშშ-ს ხელისუფლებამ კასპაროვს აცნობა, რომ ის რუსეთში დაგეგმილი მკვლელობის სამიზნეს წარმოადგენდა და მას განსაკუთრებული დაცვა დაუწესა.
• ლიეტუვაში შესაძლო სამიზნე ივან ტიუტრინი იყო. 2024 წლის გარკვეული პერიოდის განმავლობაში ის დაცვის ქვეშ იმყოფებოდა, რაც დაემთხვა იმ დროს, როდესაც, ამერიკული გამოძიების მონაცემებით, რუსეთის სპეცსამსახურების ქსელმა მოქმედება დაიწყო.
• პუბლიკაციის თანახმად, ბოლო თვეებში პოლიციამ გამოავლინა ნიშნები იმისა, რომ ტიუტრინი კვლავ გახდა სამიზნე, თუმცა საქმის მასალებიდან ბოლომდე ნათელი არ არის, ზუსტად ის იყო თუ არა ის დისიდენტი, რომლის ლიკვიდაციაც ლიეტუვაში იგეგმებოდა.
• ლიეტუვაში მყოფი სამიზნეების სიაში აგრეთვე არის გაბასოვი - აქტივისტი, რომელიც ბაშკირეთის დამოუკიდებლობისთვის იბრძვის.
• 2025 წელს მან საკუთარ მანქანაში სათვალთვალო მოწყობილობა აღმოაჩინა, ხოლო 2026 წლის გაზაფხულზე ლიეტუვის ხელისუფლებამ მასზე თავდასხმის აღკვეთის შესახებ განაცხადა.

კონტექსტი: 15 სექტემბერს აშშ-ის იუსტიციის სამინისტრომ ბრალი წაუყენა იმ ქსელის ხუთ სავარაუდო მონაწილეს, რომელიც, გამოძიების ვერსიით, რუსეთის სპეცსამსახურების ინტერესებში მოქმედებდა და აშშ-სა და ევროპაში დივერსიებსა და მკვლელობებს ამზადებდა.

• ერთ-ერთი ბრალდებული გახდა 63 წლის იური ხრამეევი, ჩრდილო-დასავლეთის ომონის ყოფილი მეთაური, რომელიც ამტკიცებს, რომ ახალგაზრდობაში პუტინთან ერთად მუშაობდა, მოგვიანებით კი მისგან ჯილდოებს იღებდა.
• აგრეთვე, ამერიკული ხელისუფლების მონაცემებით, ქსელში შედიოდნენ ხრამეევის შვილი კირილი, რომელიც ივანგოროდში მესაზღვრედ მუშაობს, რუსეთში მცხოვრები კუბელები - ომიის რომანოს დურუტი და იაიდელ დელგადო სუარესი, აგრეთვე ვენესუელელი ანხელ ესტუარდო კასტრო.
• აშშ-ის იუსტიციის სამინისტროს განცხადებით, დურუტის სახელი ფიგურირებდა პოლონეთში, ჩეხეთში, რუმინეთსა და ლიეტუვაში 2024 წლიდან დაწყებული ხანძრების სერიის საგამოძიებო მასალებში.