ახალი ამბები

რუსული დამოუკიდებელი მედია "ვაჟნიე ისტორიის" ინფორმაციით, საფრანგეთის სამხედრო საზღვაო ძალების მიერ დაკავებული ტანკერი ირანის უზენაესი ლიდერის დაღუპული მრჩევლის ოჯახთან არის დაკავშირებული.

ვითარების არსი: საფრანგეთის სამხედრო-საზღვაო ძალებმა, დიდი ბრიტანეთის სამხედრო-საზღვაო ფლოტის მონაწილეობით, კვირა დილას ატლანტის ოკეანეში რუსული "ჩრდილოვანი ფლოტის" ტანკერი Tagor-ი დააკავეს.

• ტანკერის დაკავების შესახებ ინფორმაცია საფრანგეთის პრეზიდენტმა ემანუელ მაკრონმა გაავრცელა.
• საფრანგეთის პრეზიდენტის თქმით, საერთაშორისო სანქციების ქვეშ მყოფი ტანკერი რუსეთიდან მიემართებოდა. დიდი ბრიტანეთისა და ევროკავშირის სანქციების სიების მიხედვით, Tagor-ს რუსული ნავთობი და ნავთობპროდუქტები გადააქვს. პორტალ Vesselfinder-ის მონაცემებით, ტანკერი ხშირად შედიოდა მურმანსკის პორტში.
  

კავშირი ირანთან: საზღვაო გემების რეესტრის თანახმად, Tagor-ი ეკუთვნის არაბთა გაერთიანებულ საამიროებში ბაზირებულ კომპანია Zulu Ships Management-ს.

• აშშ-ის ხელისუფლება ამ კომპანიას აკავშირებს ირანელი მოჰამედ ჰუსეინ შამჰანის ქსელთან.
• შამჰანი ადმირალ ალი შამჰანის შვილი, რომელიც თავის დროზე ირანის თავდაცვის მინისტრის, ირანის ეროვნული უსაფრთხოების საბჭოს მდივნისა და ირანის უზენაესი ლიდერის მრჩევლის პოსტებს იკავებდა.
• თავად კომპანიაში ამ კავშირებს უარყოფენ.
• ალი შამჰანი 2026 წლის თებერვალში, ამერიკული და ისრაელის სარაკეტო დარტყმების შედეგად დაიღუპა.
• აშშ-ს ფინანსთა სამინისტროს მონაცემებით, უმცროსი შამჰანის ფლოტი 50-ზე მეტი ტანკერისგან და კონტეინერების გადამზიდი სატვირთო გემისგან შედგება.