ახალი ამბები

საჰაერო განგაშის დროს ბიზნესის გაჩერება უკრაინის ეკონომიკას ყოველ საათში დაახლოებით $45 მილიონი უჯდება.

The Guardian-თან ინტერვიუში უკრაინის ეკონომიკის მინისტრმა, ოლექსანდრ კრავჩენკომ განაცხადა, რომ ინტენსიური დაბომბვების ფონზე, მთავრობა ეკონომიკის ფუნქციონირების შენარჩუნების გზებს ეძებს.

რატომ არის მნიშვნელოვანი: საჰაერო განგაშის სირენები დღეში ხშირად 10 საათამდე გრძელდება.

• როგორც მინისტრი აღნიშნავს, "როცა ხალხი ბუნკერშია, ბიზნესი ჩერდება".
• რუსეთის მიზანი ახლა უკვე პირდაპირ ეკონომიკის განადგურებაა.
• საოკუპაციო ძალები ახალი, რეაქტიული დრონებით მიზანმიმართულად უტევენ ქარხნებს, საწყობებს, ლოგისტიკურ ჰაბებსა და მონაცემთა ცენტრებს.

გამოსავალი: მინისტრის თქმით, ეკონომიკური დარტყმის შესამცირებლად, უკრაინამ ორდონიანი განგაშის სისტემა დანერგა:

• "წითელი" განგაში: სარაკეტო საფრთხე - ყველა ვალდებულია თავშესაფარში ჩავიდეს.

• "ყვითელი" განგაში: დრონების საფრთხე - ბიზნესების დიდ ნაწილს მუშაობის გაგრძელების უფლება აქვს (ამჟამად ბიზნესების 50%-ზე მეტი ყვითელი განგაშის დროს მუშაობას აგრძელებს).

რისკები: ყვითელი განგაში უსაფრთხოების გარანტია არ არის. მიმდინარე კვირის ორშაბათს, ყვითელი განგაშის დროს, რუსული რეაქტიული დრონი კიევის ცენტრში, მეცნიერებათა ეროვნულ აკადემიას დაეცა.

• თავდასხმას ორი აკადემიკოსის სიცოცხლე ემსხვერპლა, რომლებიც შენობაში მუშაობდნენ.

ფართო სურათი: მხოლოდ წელს, უკრაინის ფიზიკურმა აქტივებმა $10 მილიარდის ზარალი განიცადა. ამას ემატება შავი ზღვის პორტების საჰაერო ბლოკადაც, საიდანაც ექსპორტის ძირითადი ნაწილი გადიოდა.

• წლის ბოლომდე ბიუჯეტის დეფიციტი $27 მილიარდამდე იყო, თუმცა ხარჯების შემცირებითა და შიდა რეზერვების მოძიებით, მთავრობამ ეს მაჩვენებელი $20 მილიარდამდე შეამცირა.

• უკრაინა ევროკავშირისგან, იაპონიისგან, კანადისა და ბრიტანეთისგან დამატებით დახმარებას და მომავალი წლისთვის გათვლილი სესხების გადმოწევას ითხოვს.

რას უნდა ველოდოთ: მთავრობა ომის დაწყების დღიდან "ყველაზე რთული და მკაცრი ზამთრისთვის" ემზადება.

• ინფრასტრუქტურის დასაცავად, განიხილება ინიციატივაც, რომელიც კერძო ბიზნესებს უკრაინული საჰაერო თავდაცვის სისტემების შესყიდვის უფლებას მისცემს.