ახალი ამბები

80 წლის ასაკში გარდაიცვალა შხამ "ნოვიჩოკის" ერთ-ერთი შემქმნელი ვლადიმირ უგლევი.

ამის შესახებ სამშაბათს გამოცემა The Insider-მა გაავრცელა ინფორმაცია.

ვითარების არსი: პუბლიკაციაში ნათქვამია, რომ უგლევი 26 ოქტომბერს გარდაიცვალა. გამოცემა საკუთარი წყაროებიდან მიღებულ ცნობებს ეყრდნობა. ბოლო წლებში მეცნიერი რუსეთში, ქალაქ ანაპაში ცხოვრობდა.

• The Insider აღნიშნავს, რომ უგლევი ჟურნალისტებს კონსულტაციას უწევდა რუსული სპეცსამსახურების მიერ "ნოვიჩოკის" გამოყენების გამოძიებისას.
• დამოუკიდებელი გამოძიების დასკვნების თანახმად, სწორედ ამ ნივთიერებით მოწამლეს 2020 წელს ალექსეი ნავალნი.
• უგლევი და "ნოვიჩოკის" კიდევ ერთი შემქმნელი - აშშ-ში მცხოვრები ვილ მირზაიანოვი - მედიასთან არაერთხელ გამოეხმაურნენ 2018 წელს ბრიტანეთის ქალაქ სოლსბერიში ყოფილი საბჭოთა მზვერავის, სერგეი სკრიპალისა და მისი ქალიშვილის, იულიას მოწამვლას.
• ბრიტანეთის ხელისუფლება მიიჩნევს, რომ ეს დანაშაულიც სსრკ-ში შექმნილი მომწამვლელი ნივთიერებით, "ნოვიჩოკით" იქნა ჩადენილი. ამ დასკვნას შხამის შემქმნელებმაც დაუჭირეს მხარი.

ჩაშლილად: 2019 წლის ზამთარში ვრცელდებოდა ინფორმაცია, რომ ანაპაში მდებარე იმ ლაბორატორიის კარზე, სადაც მაშინ უგლევი მუშაობდა, გამოჩნდა ფურცელი წარწერით "ფრთხილად, პედოფილი!" და მისი ფოტოსურათით.

• კიდევ რამდენიმე მსგავსი ფურცელი უგლევმა შენობის კედელზე იპოვა. ამის შემდეგ მალევე მეცნიერს მხარის პროკურატურის გამომძიებელმა დაურეკა, მის სახლში კი ბავშვთა წინააღმდეგ მიმართულ სექსუალურ დანაშაულებთან ბრძოლის განყოფილების პოლიციელები მივიდნენ.
• მანამდე უგლევმა ჟურნალისტებს შეატყობინა საეჭვო ავტოსაგზაო შემთხვევის შესახებ, რომელშიც ის ერთი წლით ადრე, აპრილში მოყვა.

წინარე ისტორია: ვლადიმირ უგლევი 1946 წელს მურმანსკის ოლქის ქალაქ კიროვსკში დაიბადა. 1975 წელს დაამთავრა მენდელეევის სახელობის მოსკოვის ქიმიურ-ტექნოლოგიური ინსტიტუტი. 1975 წლიდან 1990 წლამდე უფროსი მეცნიერ-თანამშრომლის თანამდებობაზე მუშაობდა ГосНИИОХТ-ის ვოლსკის ფილიალში, რომელიც, სხვა საკითხებთან ერთად, "ნოვიჩოკის" შემუშავებაშიც მონაწილეობდა.

• ვილ მირზაიანოვი არაერთხელ მოუწოდებდა ქიმიური იარაღის აკრძალვის ორგანიზაციას (OPCW), შეეტანა "ნოვიჩოკი" აკრძალული ნივთიერებების სიაში. ორგანიზაციის აღმასრულებელმა კომიტეტმა ასეთი გადაწყვეტილება 2019 წლის იანვარში მიიღო.
• რუსეთის ხელისუფლება უარყოფს რაიმე კავშირს როგორც სკრიპალების, ისე ალექსეი ნავალნის მოწამვლასთან.