ახალი ამბები

პენტაგონმა ცენტრალურ სარდლობას დაავალა, დაასრულოს მომზადების პროცესი ირანის წინააღმდეგ შესაძლო მასშტაბური დარტყმების განახლებისთვის.

ვითარების არსი: ინფორმაციას ამის შესახებ საკუთარ წყაროებზე დაყრდნობით Axios ავრცელებს; წყაროს ცნობით, დონალდ ტრამპს საბოლოო გადაწყვეტილება ჯერ არ მიუღია და შესაფერის მომენტს ელოდება.

• ჯერჯერობით არ არის გადაწყვეტილი საჰაერო დარტყმების განახლების თარიღიც - გამოცემის ერთ-ერთი წყაროს ცნობით, ეს შესაძლოა ამერიკაში დაგეგმილ შუალედურ არჩევნებამდეც მოხდეს, რომლებიც 3 ნოემბერსაა ჩანიშნული.

• კამპანიის განახლება შესაძლოა ასევე დაემთხვეს ისრაელის საპარლამენტო არჩევნებს, რომლებიც 27 ოქტომბერს ჩატარდება.

ჩაშლილად: იმავე წყაროს ცნობით, საომარი მოქმედებების განახლების შემთხვევაში ამერიკელთა მთავარი სამიზნე ირანის ენერგეტიკული და ბირთვული ინფრასტრუქტურა იქნება.

• ცოტა ხნით ადრე გამოცემა Atlantic საკუთარ წყაროებზე დაყრდნობით წერდა, რომ ადმინისტრაცია განიხილავს დარტყმების განახლებას შუალედურ არჩევნებამდე - მათი წყაროს ინფორმაციით, პრეზიდენტი ფიქრობს, რომ ამგვარმა ზომებმა შესაძლოა გააუმჯობესოს რესპუბლიკური პარტიის შედეგები.

დიდი სურათი: სწორედ ირანთან დაპირისპირება იყო ტრამპის ეროვნული უსაფრთხოების გუნდის მაღალჩინოსნების შეხვედრის მთავარი თემა გასულ პარასკევს, რომელიც კემპ-დევიდის რეზიდენციაში გაიმართა.

• Axios-ის წყაროს ცნობით, ჩიხში შესული მოლაპარაკებების ფონზე ირანის წინააღმდეგ მასშტაბური დარტყმების განახლების შანსი გასულ კვირებში მნიშვნელოვნად გაიზარდა, თუმცა ნაკლებად სავარაუდოა, ეს შუალედურ არჩევნებამდე მოხდეს - მისივე თქმით, საომარი მოქმედებების განახლების ალბათობა მკვეთრად გაიზრდება არჩევნების შემდეგ.

• ამ ფონზე გასულ დღეებში ტრამპსა და ისრაელის პრემიერს, ბიბი ნეთანიაჰუს, შორის 2 სატელეფონო საუბარი შედგა. ისრაელის ლიდერი ესაუბრა სახელმწიფო მდივან რუბიოსაც.

• წყაროების ცნობით, საომარი მოქმედებების განახლება პოლიტიკურად შესაძლოა მომგებიანი იყოს ნეთანიაჰუსთვისაც, რომელსაც თვის მიწურულს მძიმე არჩევნები აქვს - ომის განახლების შემთხვევაში ნეთანიაჰუს ოპონენტებს გაურთულდებათ მისი გაკრიტიკება კამპანიის გადამწყვეტ დღეებში.

კონტექსტი: ისრაელური წყაროების ცნობით, ირანის რეჟიმი პარანოიდულ და სასოწარკვეთილ მდგომარეობაში აღმოჩნდა, რამაც მათ შესაძლოა მოქმედებისკენ უბიძგოს.

• "ირანელებმა უკვე განიცადეს 2 მოულოდნელი შეტევა, მათ აღარ სურთ მესამე", - ამბობს წყარო.