ახალი ამბები

დონალდ ტრამპმა უკრაინის პრეზიდენტთან, ვოლოდიმირ ზელენსკისთან კვირას გამართული სატელეფონო საუბრისას პირდაპირ მოითხოვა რუსულ ნავთობგადამამუშავებელ ქარხნებზე იერიშების შეჩერება.

ინფორმაცია ამის შესახებ Axios-მა გაავრცელა.

ვითარების არსი: ამგვარი მოთხოვნის მთავარი მიზეზი დიზელის გლობალური დეფიციტი და ფასების რეკორდული ზრდაა.

• Financial Times-ის თანახმად, კვირას გამართულ საუბარში ტრამპის მთავარი მოთხოვნა და გზავნილი პრაქტიკულად ასე ჟღერდა: "დიზელი, დიზელი... დიზელი".

• ზელენსკიმ საუბარს "მნიშვნელოვანი" უწოდა და გამოთქვა იმედი, რომ სამშაბათს ნიუ-იორკში ტრამპთან შეხვედრას "ბევრი რამის შეცვლა შეუძლია".

• პრეზიდენტის თქმით, დრონების კამპანია არის "ზეწოლა, რომელიც რეალურად მუშაობს", თუმცა პარალელურად "დიპლომატიამაც უნდა იმუშაოს".

• დღეს კი ტრამპმა Truth Social-ზე საჯარო განცხადებაც გაავრცელა: "უკრაინასთან ომის გამო, რუსეთმა დიზელის წარმოებაზე კონტროლი დაკარგა. ქარხნების დიდი ნაწილი აფეთქებულია... ეს აბსურდული და დაუსრულებელი ომი უნდა შეწყდეს. მთელი სამყარო იტანჯება, სანამ თვეში 25,000 ადამიანი იღუპება".

კულისებში: Financial Times-ის თანახმად, უკრაინელი მაღალჩინოსნები ვარაუდობენ, რომ ტრამპი შეგნებულად აჭიანურებს გასულ კვირას ხელმოწერილი, რუსეთის საწინააღმდეგო ახალი სანქციების აღსრულებას.

• ამას ის იყენებს როგორც ბერკეტს, ერთი მხრივ, კიევზე, რომ იერიშები შეწყდეს, მეორე მხრივ კი, მოსკოვზე, რომ მოლაპარაკებების მაგიდას დაუბრუნდეს.

• კრემლი ენერგო-ზავზე უარს ამბობს. გამოცემის წყაროების ცნობით, პუტინი ზამთარში უკრაინის ენერგოინფრასტრუქტურაზე მასობრივი საჰაერო იერიშებისთვის ემზადება, რადგან ამას მოლაპარაკებებში დამატებით ბერკეტად განიხილავს.