ახალი ამბები

რუსმა და ამერიკელმა მაღალჩინოსნებმა, მათ შორის, აშშ-ის პრეზიდენტის სპეციალურმა წარმომადგენელმა ჯარედ კუშნერმა, მოლაპარაკებები გამართეს "ჩრდილოეთის ნაკადის" გაზსადენების ფუნქციონირების აღდგენაში ამერიკელი ინვესტორის ჩართვის შესახებ.

ვითარების არსი: Reuters ხუთ წყაროზე დაყრდნობით წერს, რომ გაზსადენების აღდგენის შესახებ მოლაპარაკებებში მონაწილეობდნენ კირილ დმიტრიევი და ჯარედ კუშნერი.

• უკრაინასა და რუსეთს შორის მოლაპარაკებების პროცესში ჩართული კუშნერი ბიზნესის კეთებას მშვიდობის აღდგენის საკვანძო ფაქტორად მიიჩნევს. მისი აზრით, ასეთი შეთანხმება ამერიკელ ინვესტორებს საშუალებას მისცემდა, ომის დასრულების შემდეგ ევროპაში ენერგორესურსების მიწოდებიდან მოგება მიეღოთ.
• დმიტრიევი და კუშნერი ბოლო კვირების განმავლობაში ერთმანეთს მოსკოვსა და ნიუ-იორკში შეხვდნენ. მიუხედავად იმისა, რომ გაურკვეველი რჩება, რამდენად დეტალურად განიხილეს მათ ამ შეხვედრებზე "ჩრდილოეთის ნაკადის" პროექტი, ეს თემა დღის წესრიგში რჩება.
• "ნებისმიერი გარიგება რუსეთმა უნდა შეათანხმოს DFC-სთან (საერთაშორისო განვითარების ამერიკული საფინანსო კორპორაცია) და ფინანსთა სამინისტროსთან, და მათ სარგებელი უნდა მოუტანონ ამერიკელ გადამხდელებსა და კომპანიებს," - განაცხადა თეთრი სახლის წარმომადგენელმა გაზსადენზე მოლაპარაკებებთან დაკავშირებულ შეკითხვაზე პასუხისას. "ბოლო დროს 'ჩრდილოეთის ნაკადის' შესახებ საუბარი არ ყოფილა."

სტრიქონებს შორის: კირილ დმიტრიევი, რომელიც გერმანიისთვის რუსული გაზის მიწოდების აღდგენას ემხრობოდა, გასულ თვეში შეხვდა აშშ-ის ენერგეტიკისა და ფინანსთა სამინისტროების წარმომადგენლებს პოტენციური ამერიკულ-რუსული ენერგეტიკული ინიციატივების განსახილველად.

• გაურკვეველია რამდენად არის ვაშინგტონი დაინტერესებული გერმანიისთვის - ევროპაში ენერგიის უმსხვილესი მომხმარებლისთვის - რუსული გაზის მიწოდების განახლებით.
• აშშ-ის ერთ-ერთმა ოფიციალურმა პირმა აღნიშნა, რომ არსებული დაბრკოლებების გათვალისწინებით, საშუალო ვადიან პერიოდში შეთანხმების მიღწევა ნაკლებად სავარაუდოა. გაზსადენები "ჩრდილოეთის ნაკადი" აშშ-ისა და ევროკავშირის სანქციების ქვეშ იმყოფება, რაც ბუნებრივი აირის მიწოდების ნებისმიერ აღდგენას უკანონოს ხდის.
• დონალდ ტრამპს შეუძლია ამერიკული სანქციების გაუქმება ან შემსუბუქება, მაგრამ თუ დემოკრატები მომავალ თვეში შუალედურ არჩევნებს მოიგებენ და კონგრესში უმრავლესობას მოიპოვებენ, ეს უფრო გართულდება.

ჩაშლილად: მოსალოდნელია, რომ გერმანია და ევროპის სხვა ქვეყნები მკვეთრად დაუპირისპირდებიან "ჩრდილოეთის ნაკადის" მუშაობის აღდგენის იდეას.

• გერმანიის ეკონომიკისა და ენერგეტიკის სამინისტროს პრესსპიკერმა აღნიშნა, რომ "ჩრდილოეთის ნაკადი" და რუსული გაზი ევროპაში სანქციების ქვეშაა და ბერლინმა ალტერნატივები იპოვა. მან ხაზი გაუსვა, რომ გაზსადენების მუშაობის აღდგენას ფედერალური მთავრობის თანხმობა სჭირდება, რაც არავის სურს.
• 2022 წლის თებერვალში რუსეთის უკრაინაში შეჭრამდე, გერმანია თავისი გაზის ნახევარზე მეტს რუსეთისგან, "ჩრდილოეთის ნაკადის" ორი გაზსადენით ყიდულობდა. 

დიდი სურათი: გარდა ამისა, საერთაშორისო მედიის ცნობით, კუშნერმა და დმიტრიევმა მოლაპარაკებებზე განიხილეს სხვადასხვა საწარმოების შესყიდვა - ნავთობგადამამუშავებელი ქარხნებიდან დაწყებული, ავტოგასამართი სადგურებით დამთავრებული ევროპასა და სხვა რეგიონებში, რომლებიც რუსულ ენერგეტიკულ კომპანია "ლუკოილს" ეკუთვნის.

• ამ გეგმის თანახმად, კონსორციუმი, რომელშიც შედიან ფედერალური საინვესტიციო სააგენტო DFC და ინვესტორები კატარიდან და არაბთა გაერთიანებული საამიროებიდან, შეიძენს ამ აქტივებს, ხოლო აშშ-ის ხელისუფლება სანქციებს მოხსნის.