ახალი ამბები

აშშ-ის პრეზიდენტმა დონალდ ტრამპმა განაცხადა, რომ შესაძლოა, ის "მისტერ ვეტო" გახდეს, თუ დემოკრატები 3 ნოემბერს შუალედურ არჩევნებში უმრავლესობას მოიპოვებენ.

ვითარების არსი: Bloomberg-ის ცნობით, ეს სიტყვები ტრამპის მხრიდან იშვიათი აღიარებაა, რომ რესპუბლიკურმა პარტიამ შესაძლოა შუალედური არჩევნები წააგოს.

• "ისინი კანონპროექტებს გზავნიან, თქვენ კი ვეტოს ადებთ. საბოლოო ჯამში, ერთი-ორი თვის შემდეგ, როდესაც ყველა კანონპროექტს ვეტო დაედება - რაც, მოგეხსენებათ, უბრალოდ დროის ფუჭი კარგვაა - ისინი თქვენთან მოვლენ და შეთანხმებას დადებენ," - თქვა ტრამპმა.
• გამოცემა აღნიშნავს, რომ აშშ-ის პრეზიდენტი აქტიურად აგრძელებს საარჩევნო კამპანიას და სტუმრობს შტატებს, რომლებიც ტრადიციულად რესპუბლიკური პარტიის საყრდენი იყო, თუმცა სადაც პარტია დიდ სირთულეებს აწყდება ფასების ზრდისა და ირანში მიმდინარე ომის გამო ამომრჩეველთა უკმაყოფილების ფონზე.

სტრიქონებს შორის: საზოგადოებრივი აზრის კვლევებით, დემოკრატები რესპუბლიკელებს ეროვნულ გამოკითხვებში დიდი უპირატესობით უგებენ. 

• RealClearPolling-ის მიერ 30 ოქტომბრის ჩათვლით ჩატარებული გამოკითხვების საშუალო მაჩვენებელი აჩვენებს, რომ კონგრესის ქვედა პალატის არჩევნებში დემოკრატების მხარდაჭერა 52%-ია, ხოლო რესპუბლიკელების - 43.1%, რაც 8.9%-იანი უპირატესობაა. 
• NBC News-ის მიერ 28-30 ოქტომბერს ჩატარებულმა კვლევამ აჩვენა, რომ დემოკრატები ლიდერობენ 52%-ით 45%-ის წინააღმდეგ, ხოლო Emerson College-ის 24-26 ოქტომბრის კვლევით ეს სხვაობა 10%-ია დემოკრატების სასარგებლოდ.

დიდი სურათი: ამჟამად რესპუბლიკელები აკონტროლებენ წარმომადგენელთა პალატას, სადაც უმრავლესობისთვის 218 ადგილია საჭირო.

• Cook Political Report-ის უახლესი რეიტინგებით, რომლებიც პარასკევს განახლდა, დემოკრატები გარანტირებულად მოიგებენ 222 ოლქს, ხოლო 195-ს რესპუბლიკელები, კიდევ 18 კი - გადაუწყვეტელია.
• 18 ასეთი ოლქიდან 14-ს ამჟამად რესპუბლიკელები აკონტროლებენ, ოთხს კი - დემოკრატები.

კონტექსტი: ამჟამად სენატში რესპუბლიკელებს 53 ადგილი აქვთ, უმრავლესობის მოსაპოვებლად დემოკრატებს რესპუბლიკელების მიერ კონტროლირებული 4 შტატის მოგება სჭირდებათ.

• The New York Times/Siena University-ს უახლესი კვლევით, რომლებიც 23 ოქტომბრიდან 1 ნოემბრამდე ჩატარდა, დემოკრატი კანდიდატები ლიდერობენ სენატის შვიდიდან ექვს საკვანძო ბრძოლაში, ხოლო მეშვიდეში ფაქტობრივად თანაბარი მხარდაჭერა აქვთ კანდიდატებს.
• ტეხასში დემოკრატი ჯეიმს ტალარიკო რესპუბლიკელ კენ პაქსტონს 50%-ით უგებს 43%-ის წინააღმდეგ, ხოლო მეინში დემოკრატი ტროი ჯექსონს 51%-იანი მხარდაჭერა აქვს რესპუბლიკელი სენატორის, სიუზან კოლინზის 45%-ის წინააღმდეგ.
• ოჰაიოში ყოფილი სენატორი, დემოკრატი შეროდ ბრაუნი რესპუბლიკელ სენატორ ჯონ ჰასტედს 49%-ით უსწრებს 44%-ის წინააღმდეგ, ხოლო დემოკრატი ადამ ჰამილტონი ანალოგიური სხვაობით უსწრებს მოქმედ რესპუბლიკელ სენატორ როჯერ მარშალს კანზასში.