ახალი ამბები

ისრაელის თავდაცვის მინისტრმა ისრაელ კაცმა ოთხშაბათს განაცხადა, რომ ირანის დაზვერვის მინისტრი ესმაილ ხატიბი გასულ ღამეს განხორციელებული იერიშის შედეგად ლიკვიდირებულია.

ვითარების არსი: ხატიბი, რომელიც სასულიერო პირი იყო, ირანის დაზვერვის მინისტრის პოსტს 2021 წლიდან იკავებდა და გარდაცვლილი უზენაესი ლიდერის, ალი ხამენეის ახლო მოკავშირედ მიიჩნეოდა.

• მანამდე მას მაღალი თანამდებობები ეკავა ირანის სადაზვერვო აპარატსა და სასამართლო სისტემაში, მათ შორის დაზვერვის სამინისტროსა და გავლენიან ფონდში „ასტან კუდს რაზავი“ (Astan Quds Razavi).

სხვა მაღალჩინოსნები: მიმდინარე დღეებში ისრაელის თავდაცვის ძალებმა საჰაერო რეიდები განახორციელეს ირანის მაღალი რანგის თანამდებობის პირებზე.

• ლიკვიდირებულია ირანის დე ფაქტო მმართველი, უშიშროების საბჭოს გენერალური მდივანი ალი ლარიჯანი;

• საჰაერო რეიდს ემსხვერპლა გასამხედროებული ორგანიზაცია „ბასიჯის“ მეთაური ღოლამრეზა სოლეიმანი. მასზე იერიში „ბასიჯის“ მიერ ახლახან მოწყობილ საველე ბანაკზე მიიტანეს;

• სოლეიმანიზე იერიშს ასევე ემსხვერპლნენ „ბასიჯის“ მეთაურის მოადგილე და დაჯგუფების სხვა მაღალჩინოსნები.

• პარალელურად, ისრაელის თავდაცვის ძალებმა იერიში მიიტანეს „პალესტინის ისლამური ჯიჰადის“ ლიდერ აკრამ ალ-აჯურისა და ტერორისტული დაჯგუფების სხვა მაღალჩინოსნებზე.

• ისრაელის სამხედრო სარდლობა ვარაუდობს, რომ ალ-აჯური, სავარაუდოდ, ლიკვიდირებულია, თუმცა ინფორმაციის საბოლოო გადამოწმება კვლავ მიმდინარეობს.

დელეგირება: ისრაელის თავდაცვის მინისტრის თქმით, მან და პრემიერ-მინისტრმა ბენიამინ ნეთანიაჰუმ სამხედროებს მისცეს უფლებამოსილება, დამატებითი თანხმობის გარეშე მოკლან ნებისმიერი სხვა მაღალი რანგის ირანელი ოფიციალური პირი, რომელიც სამიზნეში იქნება ამოღებული.