ახალი ამბები

რუსულმა სოციოლოგიური კვლევების არასამთავრობო ორგანიზაცია "ლევადა-ცენტრმა" გამოაქვეყნა კვლევა, რომლის თანახმად ვლადიმირ პუტინმა 2024 წელთან შედარებით რეიტინგის მესამედი დაკარგა.

კვლევის დეტალები: კვლევის მიხედვით, აპრილის ბოლოს ვლადიმირ პუტინის ელექტორალურმა რეიტინგმა 49% შეადგინა. რაც 2024 წლის თებერვალთან შედარებით 19 პროცენტული პუნქტით ნაკლებია.

• კვლევის ფარგლებში რესპონდენტებს უნდა ეპასუხათ, ვის მისცემდნენ ხმას, არჩევნები უახლოეს კვირას რომ გამართულიყო. გამოკითხულები გვარებს თავად, მინიშნებების გარეშე ასახელებდნენ.
  
  
• 2025 წლის აპრილიდან დღემდე პუტინის რეიტინგი 13% შემცირდა.
  
  
• წინა წლის აპრილთან შედარებით, გაიზარდა იმ რესპონდენტთა რაოდენობა, რომლებმაც არ იციან, ვის მისცემდნენ ხმას.
  
  
• ასევე მოიმატა იმ მოქალაქეების წილმა, რომლებიც არჩევნებში მონაწილეობას არ აპირებენ.
  
  
• ამავდროულად, სხვა პოლიტიკოსების რეიტინგის ზრდა 1%-იან ნიშნულს არ გასცილებია.

კონტექსტი: რუსეთის სამი წამყვანი სოციოლოგიური ცენტრი – სახელმწიფოებრივი(ВЦИОМ), პროკრემლისტური(ФОМ) და დამოუკიდებელი(ლევადა-ცენტრი) - ამ გაზაფხულზე პუტინის ნდობის რეიტინგებისა და მისი მუშაობის შეფასების კლებას ერთხმად ადასტურებს.

• ФОМ და ВЦИОМ მაჩვენებლების რეკორდულ კლებაზე მიუთითებენ - ეს მინიმალური ნიშნულია ომის დაწყების შემდეგ. "ლევადას" კვლევით კი, მაჩვენებლები მობილიზაციის პერიოდის შემდეგ ყველაზე მეტად შემცირდა.
  
  
• პუტინის რეიტინგთან ერთად ეცემა მმართველი პარტიისა და სახელმწიფო სტრუქტურების რეიტინგიც.
  
  
• რეიტინგის ვარდნის მთავარი მიზეზებია გაჭიანურებული ომი, ეკონომიკური უკუსვლა და სახელმწიფო ორგანოების მიერ ინტერნეტის დაბლოკვა.