ახალი ამბები

ვლადიმირ პუტინის თქმით, უკრაინასთან კონფლიქტის დარეგულირებაში ჩართული რომელიმე მხარის იმედგაცრუების მიზეზი ამ მხარეების გადაჭარბებული მოლოდინებია - ამგვარად რუსეთის პრეზიდენტი დონალდ ტრამპის მიერ სამშვიდობო შეთანხმების მისაღწევად წარდგენილ ულტიმატუმს გამოეხმაურა. 

State Of Play: ამის შესახებ ვლადიმირ პუტინმა ბელარუსის დიქტატორ, ალექსანდრ ლუკაშენკოსთან ერთად ვალაამის სამონასტრო კომპლექსში სტუმრობისას ჟურნალისტების კითხვებზე პასუხად განაცხადა. 

• "რაც შეეხება იმედგაცრუებებს რომელიმე მხრიდან - ყველა იმედგაცრუება გადაჭარბებული მოლოდინებისგან ჩნდება - ეს ცნობილი საერთო წესია"- განაცხადა პუტინმა. 
• ამასთანავე რუსეთის პრეზიდენტმა კიდევ ერთხელ განაცხადა, რომ ომის დასასრულებლად საჭიროა "შინაარსობრივი, სერიოზული და თანამიმდევრული საუბრები ხმაურის გარეშე."
  
  
• პუტინის თქმით, კრემლი მზად არის მოლაპარაკებებისთვის ოღონდ იმ პროცესის ფარგლებში, რომელიც კონფლიქტის ფუნდამენტურ, პირველად მიზეზებს გადაჭრის. 

Big Picture: ამ თემაზე საუბრისას პუტინს არ უხსენებია უშუალოდ დონალდ ტრამპი, თუმცა ეს გვერდით მჯდომმა ალექსანდრ ლუკაშენკომ გააკეთა, რომელმაც დონალდ ტრამპს "ჩვენი საერთო მეგობარი უწოდა."

• ლუკაშენკოს თქმით, მოლაპარაკებების პროცესში კონკრეტული ვადების დათქმა დაუშვებელია. 
  
  

Context: 28 ივლისს დიდი ბრიტანეთის პრემიერ-მინისტრთან შეხვედრის დროს ტრამპმა განაცხადა, რომ რუსეთისთვის მანამდე მიცემულ 50-დღიან ვადას 10-12 დღემდე ამცირებდა და მისი ათვლა განცხადებისთანავე დაიწყებოდა. 

• ამერიკელი პრეზიდენტის თქმით, თუ დათქმულ ვადაში რუსეთი უარს იტყვის ცეცხლის შეწყვეტის შეთანხმებაზე ვაშინგტონი მოსკოვს ადრე დაპირებულ სანქციებს დაუწესებს. 
• საუბარია დამატებით 100%-იანი საბაჟო ტარიფების დაწესებაზე იმ ქვეყნებისთვის, რომლებიც რუსეთისგან ნავთობს ყიდულობენ. 
  
  
• მოგვიანებით ტრამპმა რუსეთის მოქმედებებს უკრაინაში "ამაზრზენი" უწოდა და ეჭვი გამოთქვა სანქციების ეფექტურობაში, თუმცა განაცხადა, რომ ზომებს მაინც მიიღებს.