ახალი ამბები

უკრაინის უსაფრთხოების გარანტიების დოკუმენტი რუსეთის მიერ ცეცხლის შეწყვეტის დარღვევის შემთხვევაში ევროპისა და ამერიკის ჩართულობით კოორდინირებულ სამხედრო პასუხს გულისხმობს. 

ვითარების არსი: ინფორმაციას ამის შესახებ Financial Times შიდა დისკუსიებში გაცნობიერებულ წყაროებზე დაყრდნობით ავრცელებს. 

• მათი ცნობით, რუსეთის მხრიდან ზავის დარღვევა გამოიწვევს უკრაინის, ევროპელი და ამერიკელი მოკავშირეების ერთობლივ, მრავალდონიან პასუხს. 
  
  
• გეგმის მიხედვით, ცეცხლის შეწყვეტის დარღვევიდან პირველი 24 საათში მხარს დაუჭერენ მოქმედებებს, რომელსაც უკრაინული არმიის ხელმძღვანელობა ჩათვლის საჭიროდ და გაავრცელებს დიპლომატიურ გაფრთხილებას. 

ჩაშლილად: თუ ცეცხლის დარღვევა 24 საათზე მეტ ხანს გაგრძელდება, ამოქმედდება საპასუხო მექანიზმის მეორე ფაზა, ე.წ. მსურველთა კოალიციის ძალების გამოყენებით. 

• ხოლო იმ შემთხვევაში, თუ რუსეთის საომარი მოქმედებები 72 საათზე მეტ ხანს გაგრძელდება გეგმა ითვალისწინებს ევროპელი და ამერიკელი სამხედროების კოორდინირებულ, მასშტაბურ პასუხს. 

დაეწიე ამბავს: ევროპელმა, ამერიკელმა და უკრაინელმა მაღალჩინოსნებმა აღნიშნული დოკუმენტი გასულ თვეებში რამდენიმეჯერ განიხილეს - დავოსის ეკონომიკურ ფორუმზე გამოსვლისას ვოლოდიმირ ზელენსკიმ განაცხადა, რომ უსაფრთხოების გარანტიების დოკუმენტი "100%-ით" არის მზად. 

• ტრამპის ადმინისტრაციის მიერ შექმნილი 20-პუნქტიანი სამშვიდობო გეგმა ზავის ამოქმედების შემდეგ უკრაინაში ბრიტანული და ფრანგული სამხედრო კონტინგენტების განთავსებას გულისხმობს. 
  
  
• საკვანძო საკითხად რჩება ე.წ. შეხების ხაზის მონიტორინგი, დასავლური მედიის ცნობით, ამ ფუნქციას ამერიკული მხარე შეასრულებს, საუბარია დაახლოებით 1400-კილომეტრიანი ფრონტის მაღალტექნოლოგიური მონიტორინგის სისტემაზე. 

დიდი სურათი: 27 იანვარს Financial Times წერდა, რომ ტრამპის ადმინისტრაცია უსაფრთხოების გარანტიების დოკუმენტის ხელმოწერას, მხოლოდ მას შემდეგ აპირებს, რაც უკრაინა დონეცკის ოლქიდან ჯარების გაყვანას დათანხმდება. 

• დონეცკის ოლქიდან ჯარების გაყვანის სანაცვლოდ წყაროების ცნობით, ტრამპის ადმინისტრაცია კიევს უფრო მეტი და მრავალფეროვანი შეიარაღების გადაცემას ჰპირდება.

კონტექსტი: უცნობია შეთანხმებულია თუ არა აღნიშნული მექანიზმები რუსეთთან - კრემლში არაერთხელ და კატეგორიულად უარყვეს უკრაინაში ნატოს წევრი ქვეყნების სამხედრო კონტინგენტის განთავსების შესაძლებლობა ნებისმიერ ფორმატში. 

• პარალელურად კვირის მიწურულს აბუ-დაბიში რუსეთ-უკრაინის მოლაპარაკებების ახალი ფორმატის რიგით მეორე შეხვედრა გაიმართება.