ახალი ამბები

14 დეკემბერს სიდნეიში, ბონდის სანაპიროზე სროლა მოხდა. ავსტრალიის საზოგადოებრივი მაუწყებლის ინფორმაციით, შავ ტანსაცმელში ჩაცმულმა რამდენიმე ადამიანმა ცეცხლი გახსნა. ბოლო მონაცემებით, დაიღუპა 12 ადამიანი.

სროლა ებრაული დღესასწაულის - ჰანუკის პირველ დღეს მოხდა, რომელიც წელს 14-22 დეკემბერს აღინიშნება. სანაპიროზე ადგილობრივი ებრაული სათვისტომოს წარმომადგენლები იყვნენ შეკრებილები.

ჩაშლილად: თვითმხილველების თქმით, თავდამსხმელებმა მინიმუმ 50-ჯერ გაისროლეს, სროლა 10 წუთის განმავლობაში გრძელდებოდა. სანაპიროზე შეკრებილი ადამიანების ნაწილს სროლა ფეიერვერკის ხმა ეგონა.

• სამართალდამცავების განცხადებით, მსროლელი სამი იყო. ერთი მათგანი ადგილზე პოლიციამ მოკლა, კიდევ ერთი თავდამსხმელი დაჭრეს, შემდეგ კი დააკავეს.
  
  
• შტატის პოლიციის კომისარის, მელ ლეიონის თქმით, დაჭრილია 29 ადამიანი, მათ შორის 2 პოლიციელი. ლეონმა მომხდარს ტერაქტი უწოდა. დაშავებულთა შორის ერთი ბავშვია. 
  
  
• სოციალურ ქსელებში ვრცელდება ვიდეო, რომელშიც ჩანს, რომ ერთ-ერთი თავდამსხმელი გამვლელმა განაიარაღა. 
  
  
• News.com.au-ს ცნობით, გამვლელი, რომელმაც თავდამსხმელი განაიარაღა ხილ-ბოსტნის დახლის მფლობელი, 43 წლის აჰმედ ალ-აჰმედია.

სიღრმისეულად: შემთხვევას ახალი სამხრეთ უელსის შტატის პრემიერმინისტრმა, კრის მენსმა სიდნეის ებრაულ სათვისტომოზე თავდასხმა უწოდა. 

• ისრაელელი ჟურნალისტის, ნაფტალი ჰანანიას ცნობით, ადგილზე დაიღუპა რაბინი ელი შლანგერი. გარდა ამისა, დაშავებულთა შორის არის ისრაელი-ავსტრალიის საბჭოს თავმჯდომარე არსენ ოსტროვსკი. 
  
  
• გამოცემა ABC-მ, წყაროებზე დაყრდნობით ერთ-ერთ თავდამსხმელად ნარვიდ აქრამი დაასახელა. მის სახლში ჩხრეკა მიმდინარეობს. 
  
  
• სროლის ადგილას სამართალდამცავებმა თვითნაკეთი ასაფეთქებელი მოწყობილობა აღმოაჩინეს. ადგილზე მუშაობენ გამნაღმველები.