ახალი ამბები

MI6-ის ახალმა ხელმძღვანელმა ორშაბათს "აგრესიული, ექსპანსიონისტური" რუსეთი გააკრიტიკა და პუტინი გააფრთხილა, რომ ბრიტანეთის დაზვერვა უკრაინას არ მიატოვებს.

ვითარების არსი: MI6-ის შტაბ-ბინაში პირველი გამოსვლისას, ბლეიზ მეტრეველმა განაცხადა, რომ ბრიტანეთის ერთგულება კიევის მიმართ ურყევია: "პუტინს ეჭვი არ უნდა შეეპაროს, რომ ჩვენი მხარდაჭერა მტკიცეა. წნეხი, რომელსაც ვახორციელებთ, შენარჩუნდება."

• მოსკოვის მიერ ბრიტანეთისთვის შექმნილ რისკებზე საუბრისას მეტრეველმა აღნიშნა: "ქაოსის ექსპორტი რუსული მიდგომაა და არა შემთხვევითი შეცდომა საერთაშორისო ურთიერთობებში. მზად უნდა ვიყოთ იმისთვის, რომ ეს გაგრძელდება მანამ, სანამ პუტინი იძულებული არ გახდება შეცვალოს თავისი გათვლები."
• ეს განცხადება მან იმ ფონზე გააკეთა, როდესაც დონალდ ტრამპის ადმინისტრაცია აგრძელებს უკრაინაზე ზეწოლას, რათა საშობაოდ სამშვიდობო შეთანხმებას მიაღწიოს.

ჩაშლილად: ორშაბათს ბრიტანეთის პრემიერი კირ სტარმერი ვოლოდიმირ ზელენსკის, ტრამპის წარმომადგენლებს, საფრანგეთის პრეზიდენტ ემანუელ მაკრონს და გერმანიის კანცლერ ფრიდრიხ მერცს ბერლინში შეუერთდება, რათა განიხილონ სამშვიდობო გეგმის ახალი ვერსია.

• მეტრეველის თქმით, ფრონტის ხაზი ყველგანაა და სააგენტო მაქსიმალურად უნდა დაეუფლოს ტექნოლოგიებს. 
• "ჩვენ ისე კომფორტულად უნდა ვგრძნობდეთ თავს კოდებთან, როგორც ადამიანურ წყაროებთან; თავისუფლად უნდა ვფლობდეთ Python-ს და სხვა მრავალ ენას." - ხაზი გაუსვა დაზვერვის უფროსმა.
• ტექნოლოგიაზე ფოკუსირებასთან ერთად, მან აღნიშნა, რომ კონფლიქტის წესები გადაიწერება რუსეთისა და სხვა მტრული აქტორების მიერ და მსოფლიო ახალი "გაურკვევლობის ეპოქის" წინაშე დგას.

დიდი სურათი: რუსეთი აქტიურად არის ჩართული ევროპულ ქვეყნებთან ჰიბრიდულ ომში და კიბერშეტევებში. 

• წელს Jaguar Land Rover-ს დამანგრეველმა კიბერშეტევამ 1.9 მილიარდი ფუნტ სტერლინგის ზარალი მიაყენა, ხოლო Marks and Spencer-ზე მსგავსი თავდასხმით მიღებული ზარალი £300 მილიონი იყო.
• ბრიტანეთის დაზვერვამ ასევე აღნიშნა, რომ რუსეთის პრეზიდენტი საზღვაო ფლოტის მოდერნიზებას ცდილობს, რათა თავს დაესხას კრიტიკულ წყალქვეშა კაბელებსა და მილსადენებს.  

კონტექსტი: ბლეიზ მეტრეველმა სერ რიჩარდ მური MI6-ის ხელმძღვანელის თანამდებობაზე წელს შეცვალა და გახდა პირველი ქალი, რომელიც საგარეო დაზვერვის სამსახურს ხელმძღვანელობს 116-წლიანი ისტორიის განმავლობაში.