ახალი ამბები

რუსული საექსპორტო ნავთობის, Urals-ის ფასი ბარელზე დაახლოებით 34 დოლარამდე შემცირდა. ამის მიზეზი აშშ-ის მიერ რუსეთის ნავთობის სექტორის კომპანიების — "როსნეფტისა" და "ლუკოილის" სანქცირებაა. შესაბამის მონაცემებს კომპანია Argus Media-ზე დაყრდნობით სააგენტო Bloomberg აქვეყნებს.

ვითარების არსი: 19 დეკემბრის მონაცემებით, Urals-ის მარკის ნავთობის შეძენა შემდეგ ფასებში იყო შესაძლებელი: ბალტიის ზღვის პორტებიდან - $34.82 ბარელზე; შავი ზღვის პორტებიდან - $33,17 ბარელზე.

• შედარებისთვის, იმავე დღეს ეტალონური მარკის, Brent-ის ფასი 61 დოლარს შეადგენდა.
• როგორც Bloomberg აღნიშნავს, წლის განმავლობაში Brent-ის ფასი გაცილებით ნაკლებად შემცირდა, ვიდრე Urals-ის, რაც პირდაპირ მიუთითებს სანქციების ეფექტურობაზე.
• Argus-ის მონაცემებით, ამჟამად Urals-ზე ფასის კლება საშუალოდ 27 დოლარია ბარელზე. ამავდროულად, გამოცემა წერს, რომ რუსული საწვავის დაბალი ფასი აიძულებს ზოგიერთ ნავთობგადამამუშავებელ ქარხანას, უგულებელყონ სანქციები და შეიძინონ ის.

ჩაშლილად: ჯერ კიდევ 16 დეკემბერს Bloomberg წერდა, რომ რუსული ექსპორტიორი კომპანიები ბალტიის, შავი და იაპონიის ზღვების პორტებიდან გაგზავნილ ნავთობში საშუალოდ 40 დოლარზე ოდნავ მეტს იღებდნენ.

• სააგენტომ მაშინვე აღნიშნა, რომ რუსული ნავთობის ფასი ყველაზე დაბალ ნიშნულზეა უკრაინაში ომის დაწყების შემდეგ.

დიდი სურათი: ვაშინგტონმა და ლონდონმა სანქციები დააწესეს "ლუკოილის," "როსნეფტისა" და მათი 34 შვილობილი სტრუქტურის წინააღმდეგ. 

• 18 დეკემბერს ბრიტანეთის ხელისუფლებამ სანქციები დააწესა 24 ფიზიკური და იურიდიული პირის, მათ შორის ნავთობკომპანიების: "ტატნეფტის," "რუსნეფტის," "რუსნეფტეგაზისა" და "ნნკ-ოილის" წინააღმდეგ.
• იმავე დღეს ევროკავშირმა შავ სიაში შეიყვანა რუსეთის ე.წ. "ჩრდილოვანი ფლოტის" 41 ტანკერი. ამით სანქცირებული გემების საერთო რაოდენობა 600-მდე გაიზარდა.