ახალი ამბები

უკრაინის პრეზიდენტმა ვოლოდიმირ ზელენსკიმ და თავდაცვის მინისტრმა მიხაილო ფედოროვმა კომპანია Palantir Technologies-ის აღმასრულებელ დირექტორს, ალექს კარპს უმასპინძლეს.

ვითარების არსი: შეხვედრის მთავარ საკითხს ომში უპირატესობის მოსაპოვებლად ხელოვნური ინტელექტის (AI) გამოყენების გაფართოება წარმოადგენდა.

• „სიმბოლურია, რომ ალექსი იყო ერთ-ერთი პირველი დასავლური ტექნოლოგიური გიგანტის ხელმძღვანელი, რომელიც 2022 წლის ივნისში, სრულმასშტაბიანი შეჭრის დაწყებისთანავე ეწვია კიევს და მხარი დაუჭირა უკრაინას. მას შემდეგ ჩვენი თანამშრომლობა აქტიურ ფაზაშია“, - აღნიშნა ფედოროვმა.

თანამშრომლობა: პარტნიორობის ფარგლებში უკრაინამ უკვე დანერგა რამდენიმე კრიტიკული სისტემა:

• შემუშავდა საჰაერო თავდასხმების დეტალური ანალიზის სისტემა;

• დანერგილია AI გადაწყვეტილებები დიდი მოცულობის სადაზვერვო მონაცემების დასამუშავებლად;

• ტექნოლოგიები ინტეგრირებულია რუსეთის ზურგში შორი მანძილის დარტყმების დაგეგმვის პროცესში.

პროექტი „Brave1 Dataroom“: კიევმა Palantir-თან ერთად ჩაუშვა პროექტი „Brave1 Dataroom“. ეს არის პლატფორმა, რომელიც დეველოპერებს წვდომას აძლევს ბრძოლის ველის რეალურ მონაცემებზე ხელოვნური ინტელექტის მოდელების მოსამზადებლად.

• ამჟამად 100-ზე მეტი კომპანია მუშაობს 80-ზე მეტ მოდელზე, რომელთა მიზანია რთულ პირობებში საჰაერო სამიზნეების, მათ შორის რუსული დრონების აღმოჩენა და გადაჭერა.

უპირატესობა და მომავალი: „დღეს ტექნოლოგიებს, ხელოვნურ ინტელექტს, მონაცემთა ანალიზსა და ომის მათემატიკას პირდაპირი გავლენა აქვს ბრძოლის ველის შედეგებზე“, - განაცხადა თავდაცვის მინისტრმა.

• მისი თქმით, უკრაინის მიზანია პარტნიორობის გაძლიერება ისეთ პროექტებში, რომლებიც ქვეყანას ტექნოლოგიურ უპირატესობას მიანიჭებს.

• ზელენსკიმ სოციალურ ქსელ X-ში დაწერა, რომ Palantir-ს აქვს უზარმაზარი პოტენციალი და არსებობს სფეროები, სადაც მხარეები ერთმანეთისთვის სასარგებლო იქნებიან.

• მხარეებმა განიხილეს ტექნოლოგიური განვითარება როგორც საბრძოლო ოპერაციების, ისე სამოქალაქო საჭიროებების კონტექსტში.

• Palantir-ის გუნდს შეხვედრაზე აჩვენეს, თუ როგორ იცავს უკრაინა საჰაერო სივრცეს, როგორ აკავებს მტერს ფრონტის ხაზზე და როგორ აყენებს დარტყმებს რუსეთის ეკონომიკას.

ცნობისთვის: Palantir Technologies მონაცემთა ანალიტიკისა და თავდაცვის სფეროში მსოფლიოს ერთ-ერთი წამყვანი კომპანიაა. ის აშშ-ის 10 უმსხვილეს ტექნოლოგიურ კომპანიას შორის შედის და მისი კაპიტალიზაცია 330 მილიარდ დოლარს შეადგენს. მის ტექნოლოგიებს ნატოს ქვეყნების შეიარაღებული ძალები და სადაზვერვო სამსახურები ოპერატიული დაგეგმვისა და ბრძოლის ველის მართვისთვის იყენებენ.