ახალი ამბები

აშშ-ის პრეზიდენტი დონალდ ტრამპი უკმაყოფილოა ირანის ხისტი პოზიციებით პაკისტანის შუამავლობით მიმდინარე მოლაპარაკებებში. მისი ზოგიერთი თანაშემწის თქმით, ახლა ის უფრო სერიოზულად განიხილავს ფართომასშტაბიანი საბრძოლო მოქმედებების განახლების შესაძლებლობას, ვიდრე ბოლო კვირების განმავლობაში. 

ვითარების არსი: ტელეკომპანია CNN წყაროებზე დაყრდნობით აღნიშნავს, რომ ტრამპი მოთმინებას კარგავს ჰორმუზის სრუტის ხანგრძლივი ჩაკეტვის გამო.

• წყაროების თქმით, ირანის ბოლო პასუხმა, რომელსაც ტრამპმა "აბსოლუტურად მიუღებელი" და "სულელური" უწოდა, რამდენიმე მაღალჩინოსანს ეჭვი გაუჩინა, რამდენად მზად არის ირანი მოლაპარაკებებზე სერიოზული პოზიციის დასაკავებლად.
• ტელევიზიის თანამოსაუბრეები ხაზს უსვამენ, რომ ადმინისტრაციაში არსებობს სხვადასხვა ბანაკი, რომლებიც შემდგომი მოქმედების განსხვავებულ გზებს უწევენ რეკომენდაციას.
• ომის განახლებას მხარს უჭერენ პენტაგონის მაღალჩინოსნები, რათა აიძულონ ისინი მოლაპარაკებების მაგიდასთან დასხდნენ - მათ შორის წერტილოვან დარტყმებს, რაც თეირანის პოზიციას კიდევ უფრო დაასუსტებს.
• სხვები კვლავ დაჟინებით მოითხოვენ დიპლომატიისთვის შანსის მიცემას.

სტრიქონებს შორის: ტრამპის გარემოცვაში ბევრს სურს, რომ პაკისტანელი შუამავლები უფრო პირდაპირები იყვნენ ირანელებთან კომუნიკაციაში. ზოგიერთი მაღალჩინოსანი სვამს კითხვას, გადასცემენ თუ არა პაკისტანელები ირანს ტრამპის აგრესიულ უკმაყოფილებას მოლაპარაკებების მიმდინარეობასთან დაკავშირებით.

• ორი წყაროს თქმით, ადმინისტრაციის ზოგიერთი წარმომადგენელი ასევე მიიჩნევს, რომ პაკისტანი ხშირად უზიარებს აშშ-ს ირანული პოზიციის უფრო პოზიტიურ ვერსიას, ვიდრე ეს სინამდვილეშია.
• რეგიონის ქვეყნები და პაკისტანი ინტენსიურ ძალისხმევას მიმართავენ, რათა ირანელებს მიაწვდინონ ხმა, რომ ტრამპი იმედგაცრუებულია და ეს მათი ბოლო შანსია სერიოზულად ჩაერთონ დიპლომატიაში.
• "აშშ და ირანი მოლაპარაკებებისადმი მიდგომისას ხელმძღვანელობენ მოთმინების სხვადასხვა კრიტერიუმითა და ვადებით, თეირანი კი ათწლეულების განმავლობაში უძლებს ეკონომიკურ ზეწოლას," - ხაზი გაუსვა ერთ-ერთმა წყარომ.

დიდი სურათი: ორშაბათს ტრამპი თეთრ სახლში კვლავ შეხვდა ეროვნული უსაფრთხოების გუნდს შემდგომი მოქმედების ვარიანტების განსახილველად.

• მოლაპარაკებების მიმდინარეობის მცოდნე პირები ამბობენ, რომ მნიშვნელოვანი გადაწყვეტილება იმის შესახებ, თუ როგორ გაგრძელდეს პროცესი, ნაკლებად სავარაუდოა პრეზიდენტის ჩინეთში გამგზავრებამდე.

კონტექსტი: მანამდე ირანულმა საინფორმაციო სააგენტო IRNA-მ წყაროებზე დაყრდნობით გაავრცელა ინფორმაცია, რომ ირანმა, პაკისტანის შუამავლობით, აშშ-ს გადასცა ოფიციალური პასუხი ამერიკის ბოლო წინადადებებზე ომის დასრულების პირობებთან დაკავშირებით.