ახალი ამბები

რუსეთის საგარეო დაზვერვის სამსახურმა (СВР) გამოაქვეყნა განცხადება, რომლის მიხედვითაც, უკრაინული სპეცსამსახურები რუსული საზოგადოების დესტაბილიზაციას ცდილობენ.

რატომ არის მნიშვნელოვანი: ბოლო პერიოდში რუსი Z-ბლოგერების ნაწილი ღიად აკრიტიკებს კრემლის გადაწყვეტილებებს. უკმაყოფილების ერთ-ერთი მთავარი მიზეზი ტელეგრამის შესაძლო დაბლოკვაა, რომელსაც რუსი სამხედროები ფრონტზე კომუნიკაციისთვის აქტიურად იყენებენ.

დეტალები: დაზვერვის მტკიცებით, უკრაინამ რუსული სამხედრო და პატრიოტული არხების „შესყიდვის კამპანია“ აპრილის ბოლოს დაიწყო.

• СВР ამბობს, რომ უკრაინის უსაფრთხოების სამსახური (СБУ) ყალბი აქაუნთებით უკავშირდება არხების მფლობელებს და ყიდვას სთავაზობს.

• დაზვერვის ვერსიით, გეგმაა პატრიოტული კონტენტის საფარქვეშ „დეზინფორმაციის“ გავრცელება და რუსეთის პოლიტიკური და სამხედრო ხელმძღვანელობის დისკრედიტაცია.

• სპეცსამსახურს არ დაუსახელებია არცერთი კონკრეტული არხი, რომელიც უკვე „იყიდეს“ ან მსგავსი შეთავაზება მიიღო.

Z-ბლოგერების დევნა: კრემლი მანამდეც სჯიდა იმ პატრიოტ ბლოგერებს, რომლებიც სამხედრო ხელმძღვანელობას ან პუტინს აკრიტიკებდნენ:

• იგორ სტრელკოვი (გირკინი): 2024 წლის დასაწყისში ექსტრემიზმის ბრალდებით 4 წლით პატიმრობა მიუსაჯეს.

• პაველ გუბარევი და ალექსანდრ ვასკოვსკი: ე.წ. „რუსული გაზაფხულის“ აქტივისტებს არმიის დისკრედიტაციის მუხლით წაუყენეს ბრალი.

რატომ ახლა: СВР-ის ეს განცხადება დაემთხვა ფრონტზე წარუმატებლობას, ეკონომიკურ პრობლემებსა და ინტერნეტ-ცენზურის გამკაცრებას, რამაც გაზაფხულზე ხელისუფლების რეიტინგის ვარდნა გამოიწვია.