ახალი ამბები

ისრაელის "ლევიათანის" ბუნებრივი აირის საბადომ ქვეყნის ისტორიაში ყველაზე მასშტაბურ საექსპორტო შეთანხმებას მოაწერა ხელი, რომლის ფარგლებშიც ეგვიპტე 35 მილიარდი დოლარის ღირებულების ბუნებრივ აირს შეისყიდის. ამის შესახებ "ლევიათანის" ერთ-ერთმა პარტნიორმა, კომპანია NewMed-მა განაცხადა.

State Of Play: Al Arabiya-ს ცნობით, "ლევიათანის" საბადოდან (ისრაელის ხმელთაშუა ზღვის სანაპიროზე მდებარე საბადო, 600 მილიარდი კუბური მეტრის გაზის მარაგებით - რედ.), ეგვიპტე 130 მილიარდ კუბურ მეტრ გაზს მიიღებს.

• "ლევიათანის" საბადო ეგვიპტეს გაზს მას შემდეგ აწვდის, რაც 2020 წელს ბუნებრივი აირის წარმოება დაიწყო. 2019 წელს გაფორმდა თავდაპირველი შეთანხმება 60 მილიარდ კუბურ მეტრზე – წელიწადში 4.5 მილიარდი კუბური მეტრი – რომელსაც, სავარაუდოდ, 2030-იანი წლების დასაწყისში სრულად მიიღებს ეგვიპტე.
• NewMed-ის განცხადებით, ხმელთაშუა ზღვის უდიდესმა ბუნებრივი აირის საბადო "ლევიათანმა," 2020 წლიდან ეგვიპტეს უკვე 23.5 მილიარდი კუბური მეტრი გაზი მიაწოდა.
• "ეს არის სტრატეგიულად ყველაზე მნიშვნელოვანი შეთანხმება, რომელიც აღმოსავლეთ ხმელთაშუა ზღვაში ოდესმე განხორციელებულა და აძლიერებს ეგვიპტის, როგორც რეგიონში ყველაზე მნიშვნელოვანი ჰაბის პოზიციას," – განაცხადა NewMed-ის აღმასრულებელმა დირექტორმა, იოსი აბუმ.
• "ეს შეთანხმება, რომელიც ჩვენი ძლიერი რეგიონული პარტნიორობის წყალობით გახდა შესაძლებელი, შემდგომი რეგიონული საექსპორტო შესაძლებლობების კარს გააღებს, რაც კიდევ ერთხელ ადასტურებს, რომ ბუნებრივი აირი და ზოგადად ენერგეტიკული ინდუსტრია შეიძლება თანამშრომლობის საყრდენი იყოს." - აღნიშნა აბუმ.

Big Picture: ბოლო 2 წლის განმავლობაში ეგვიპტეში ენერგეტიკული პრობლემებია და ელექტროენერიგია მოსახლეობას ხშირად არასრულყოფილად მიეწოდება. ამის მიზეზი ეკონომიკური პრობლემები და ბუნებრივი აირის დეფიციტია.

• ივნისში ისრაელსა და ირანს შორის 12-დღიანი ომის დროს, უსაფრთხოების მიზეზებით, "ლევიათანის" საბადოდან გაზის ექსპორტი შეჩერებული იყო.
• ხუთშაბათს მიღწეული შეთანხმების მიხედვით, პირველ ეტაპზე, 2026 წლის დასაწყისიდან "ლევიათანი" ეგვიპტეს 20 მილიარდ კუბურ მეტრ გაზს მიაწვდის დამატებითი მილსადენების შეერთების შემდეგ.
• დანარჩენ 110 მილიარდ კუბურ მეტრს კი მეორე ეტაპზე გაიტანს, რომელიც "ლევიათანის" გაფართოება და ისრაელიდან ეგვიპტეში ახალი მილსადენის მშენებლობა დასრულდება.