ახალი ამბები

გამოცემა Washington Post წერს, რომ აშშ-ს იუსტიციის დეპარტამენტის მიერ გამოქვეყნებული ფაილებიდან ჩანს, რომ ჯეფრი ეპსტინი ვლდიმირ პუტინთან და სხვა რუს მაღალჩინოსნებთან კონტაქტზე გასვლას ცდილობდა.

ჩაშლილად: დოკუმენტების მიხედვით, რამდენიმე რუს მაღალჩინოსანს ეპსტინთან პირდაპირი მიმოწერა ჰქონდა და წლების განმავლობაში პუტინთან შეხვედრის ორგანიზებას ცდილობდა.

• ეპსტინის საბუთებში პუტინის სახელი თითქმის ათასჯერ ფიგურირებს. თუმცა უმეტესად ეპსტინის კორესპონდენციაში და არა პირად მიმოწერაში.
  
  
• პირად მიმოწერაში კი ჩანს, რომ 2010-იან წლებში ეპსტინმა ნორვეგიის ყოფილი პრემიერმინისტრის, თორნბიორნ იაგლანდის გავლით, პუტინთან კავშირის დამყარება არაერთხელ სცადა.
  
  
• "ვიცი რომ პუტინს უნდა შეხვდე. მას სასოწარკვეთით სურს დასავლური ინვესტიციები საკუთარ ქვეყანაში. მე შემიძლია მას დავეხმარო". - წერს იაგლანდს ეპსტინი.
  
  
• 2014 წლის იანვარში იაგლანდი პუტინის გასაცნობად, ეპსტინს სოჭის ოლიმპიადაზე ჩამოსვლას სთავაზობს ამჯერად მილიარდერი თავს იკავებს და წერს, რომ რუსეთის მიერ მალაიზიის ავიახაზების თვითმფრინავის ჩამოგდების ფონზე "შეხვედრისთვის ცუდი დროა". 
  
  
• ეპსტინმა იაგლანდს იგივე თხოვნით ასევე 2015, 2016, 2017 და 2018 წლებში მიმართა. 
  
  
• 2013 წელს, ისრაელის ყოფილ პრემიერმინისტრ ეჰუდ ბარაკთან მიმოწერიდან ვიგებთ, რომ ეპსტინი დაპატიჟებულია სანქტ-პეტერბურგის ეკონომიკურ ფორუმზე, რომელსაც პუტინი ყოველთვის სტუმრობს, თუმცა ბიზნესმენი მოწვევაზე უარს ამბობს და წერს: "თუ (პუტინს) მას სურს შეხვედრა, საჭიროა შევხვდეთ განმარტოებით და დიდი ხნით".

სიღრმისეულად: პუტინთან შეხვედრის წარუმატებელი მცდელობების მიუხედავად, ეპსტინმა რამდენიმე რუს მაღალჩინოსანთან დაამყარა კონტაქტი.

სერგეი ბელიაკოვი

• მიმოწერიდან ჩანს, რომ 2014-2018 წლებში ეპსტინს ახლო ურთიერთობა ჰქონდა რუსეთის ეკონომიკური განვითარების მინისტრის მოადგილესთან, ფედერალური უსაფრთხოების აკადემიის კურსდამთავრებულ სერგეი ბელიაკოვთან. 
  
  
• ირკვევა, რომ ეპსტინი და ბელიაკოვი პერიოდულად ხვდებოდნენ. გარდა ამისა ბიზნესმენმა მინისტრის მოადგილეს გააცნო ეჰუდ ბარაკი, ასევე 2015 წელს ეპსტინმა დააორგანიზა შეხვედრა ბელიაკოვსა და ამერიკელ მილიარდერ პიტერ ტილს შორის.
  
  
• ერთ-ერთ წერილში ეპსტინი რუს მაღალჩინოსანს დახმარებას სთხოვს: "ერთი რუსი გოგონაა მოსკოვში, რომელიც ძლევამოსილ ნიუ-იორკელ ბიზნესმენებს აშანტაჟებს. ეს ცუდია საერთო საქმისთვის... რა მოსაზრებები გაქვს?"
  
  
• პასუხად რუსი მაღალჩინოსანი ეპსტინს დახმარებას პირდება და წერს, რომ შეხვდება ადამიანს, რომელიც ქალს იცნობს.

ოლეგ დერიპასკა

• გამოქვეყნებული ფაილებიდან ირკვევა, რომ ეპსტინი დაახლოებული იყო რუს მილიარდერთან, ოლეგ დერიპასკასთან.
  
  
• დერიპასკა დამეგობრდა აშშ-ში გაერთიანებული სამეფოს ელჩთან, პიტერ მანდელსონთან, რომელიც ეპსტინთან დაახლოებული პირი იყო.
  
  
• მიმოწერიდან ირკვევა, რომ 2008 წელს მანდელსონი ბიზნესმენ ნეტ როტშილდთან ერთად დერიპასკას იახტაზე ისვენებდა.

ვიტალი ჩურკინი

• მიმოწერის თანახმად, ეპსტინი დაეხმარა გაეროში რუსეთის წარმომადგენელს, ვიტალი ჩურკინს.
  
  
• ბიზნესმენი ჩურკინის შვილს, აშშ-ში დასაქმებაში დაეხმარა, რაზეც რუსი დიპლომატისგან მადლობის წერილი მიიღო.

მარია დროკოვა

• 2017-2019 წლებში ეპსტინს საქმიანი მიმოწერა ჰქონდა რუს ინვესტორთან, მარია დროკოვასთან.
  
  
• დროკოვა ახალგაზრდული პუტინისტური, ნაციონალისტური მოძრაობა "ნაშის" ლიდერი და სახე იყო, თუმცა მოგვიანებით ორგანიზაცია დატოვა, სან-ფრანცისკოში გადასახლდა და საინვესტიციო ბიზნესით დაკავდა.
  
  
• ეპსტინის წერილების მიხედვით, ბიზნესმენი დროკოვას მისი პიარის გაუმჯობესებაზე მუშაობას სთხოვდა.
  
  
• გარდა ამისა, დროკოვამ ეპსტინს "სილიკონის მდელოს" რამდენიმე დამწყებ კომპანიაში ინვესტიცია ჩაადებინა.

წინარე ისტორია: მიმდინარე წელს აშშ-ს იუსტიციის დეპარტამენტმა თითქმის 3 მილიონი დოკუმენტი გამოაქვეყნა, რომელიც აწ გარდაცვლილი, სექსუალურ ძალადობასა და ტრეფიკინგში ბრალდებული ბიზნესმენის, ჯეფრი ეპსტინის სახელს უკავშირდება.

• ე.წ. ეპსტინის ფაილები შედგება ბიზნესმენის პირადი და საქმიანი მიმოწერისგან, ასობით ფოტოსგან, თანხების გადარიცხვის ქვითრებისგან და სხვა საბუთებისგან.
  
  
• გამოქვეყნებულ დოკუმენტებში ფიგურირებს არაერთი გავლენიანი ადამიანის, მათ შორის, ილონ მასკის, ჩარლზ III-ის ძმის, ენდრიუს, სხვადასხვა პოლიტიკოსისა და ბიზნესმენის სახელი.
  
  
• ეპსტინი 2019 წელს დააკავეს, ბრალის დამტკიცებამდე ის საკანში მკვდარი იპოვეს. ოფიციალური ვერსიით მან სიცოცხლე თვითმკვლელობით დაასრულა.