ახალი ამბები

გასული 2 კვირის განმავლობაში უკრაინაში რუსეთის საოკუპაციო არმიის წინსვლის ტემპის ზრდა შეწყდა - ეს შესაძლოა რამდენიმე ფაქტორით იყოს განპირობებული, მათ შორის იმით, რომ ამ დროისთვის საოკუპაციო არმია 2 მსხვილი ქალაქის ალყაში მოქცევაზეა კონცენტრირებული. 

State Of Play: ამის შესახებ უკრაინის გენერალურ შტაბთან დაახლოებული OSINT პროექტის, Deep State-ის მონაცემთა ანალიზი მეტყველებს. 

• გასულ კვირას რუსეთის არმიამ უკრაინაში 96 კვადრატული კილომეტრი დაიკავა, რაც დაახლოებით იმდენივია, რამდენიც წინამორბედ კვირას და მკვეთრად ჩამოუვარდება ივლისიის დასაწყისში დაფიქსირებულ პიკურ მაჩვენებლებს. 
  
  
• წინსვლის ყველაზე მაღალი ტემპი საოკუპაციო არმიამ კვლავ ქალაქ პოკროვსკის მიმართულებით აქვს, აქ რუსეთმა 41 კვადრატული კილომეტრი დაიკავა, კიდევ 27 კვადრატული კილომეტრი გადავიდა რუსეთის არმიის კონტროლქვეშ ზაპორიჟიისა და დონეცკის ოლქის საზღავრზე.
  
  
• რუსეთის არმია კვლავ აქტიურად უტევს ხარკივის ოლქში მდებარე ქალაქ კუპიანსკის მიმართულებით, სადაც მათ გასულ კვირას 18 კვადრატული კილომეტრი დაიკავეს. 
  
  
• მთლიანად ივლისის განმავლობაში რუსეთის არმიამ ჯამურად 502 კვადრატული კილომეტრი დაიკავა, რაც დაახლოებით იმდენივეა, რამდენიც ივნისში (541 კვ/კმ)
  
  
• ამასთანავე ანალიზი მეტყველებს, რომ ივლისის პირველი კვირის შემდეგ წინსვლის ტემპის შემცირებაზე მიუთითებს. 
  
  

Big Picture: დაკავებული ფართობის შემცირება შესაძლოა რამდენიმე ფაქტორით იყოს განპირობებული - საოკუპაციო არმია ბოლო კვირების განმავლობაში კონცენტრირებულია 2 მსხვილი ქალაქის, პოკროვსკისა და კუპიანსკის ალყაში მოქცევაზე, ეს კი ძირითადად ფლანგის გარღვევის ოპერაციებს გულისხმობს, რა დროსაც დაკავებული ფართობის მოცულობა არ არის მაღალი. 

• სამხედრო ექსპერტების შეფასებით ალყის ოპერაციის წარმატებისა და უკრაინის არმიის ლოჯისტიკის დაზიანების შემთხვევაში დაკავებული ფართობის ტერიტორია დროის მოკლე მონაკვეთში მკვეთრად გაიზრდება.
  
  

Сontext: მიუხედავად ამისა, უკრაინული წყაროების შეფასებით პოკროვსკის ირგვლივ უკრაინული არმიის მდგომარეობა ეტაპობრივად უარესდება და კრიტიკულ უახლოვდება. 

• ამის შესახებ მეტყველებს ქალაქის ფარგლებში მოქმედი რუსული სადაზვერვო-დივერსიული ჯგუფების გამოჩენა და მომარაგების ერთ-ერთ მთავარ არტერიასთან, დობროპოლიესთან დამაკავშირებელ მაგისტრალთან მიმდინარე ბრძოლები. 
  
  
• მომარაგების კუთხით შექმნილი პრობლემების ფონზე ადგილობრივი სამხედრო ადმინისტრაციის უფროსმა, სერჰიი დობრიაკმა განაცხადა, რომ ქალაქში სასურსათო მაღაზიები უახლოეს დღეებში დაიხურება. 
  
  
• უკრაინის შეიარაღებული ძალების მთავარსარდლის, ალექსანდრ სირსკის თქმით, პოკროვსკის ირგვლივ რუსეთს 110 ათასიანი სამხედრო დაჯგუფება ჰყავს მობილიზებული. 
  
  
• გასული წლის დასაწყისიდან მოყოლებული რუსეთმა უკრაინაში 5000 კვადრატული კილომეტრი დაიკავა, რაც მცირედით აღემატება უკრაინის ტერიტორიის 1%-ს. 
  
  

Go Deeper: The Economist: მიმდინარე კამპანიაში რუსეთის დანაკარგები რეკორდულად მაღალია