ახალი ამბები

ამერიკის პრეზიდენტი გამოეხმაურა ვლადიმირ პუტინის საგანგებო გამოსვლას, რომელშიც რუსეთის პრეზიდენტმა უარი თქვა უკრაინისა და დასავლელი მოკავშირეების მოთხოვნაზე 30-დღით ცეცხლის დაუყოვნებლივ შეწყვეტის თაობაზე. 

State Of Play: ამის შესახებ დონალდ ტრამპი საკუთარ სოციალურ ქსელ Thruth-ში წერს - ამერიკელი პრეზიდენტი უკრაინას მოუწოდებს დათანხმდეს პუტინის წინადადებას პირდაპირი მოლაპარაკებების შესახებ. 

• "პრეზიდენტ პუტინს არ სურს ცეცხლის შეწყვეტის შეთანხმება და 15 მაისს პირდაპირ შეხვედრას (რედ. უკრაინასთან) ითხოვს, სისხლისღვრის დასასრულებლად. უკრაინა ამ წინადადებას დაუყოვნებლივ უნდა დათანხმდეს"- წერს ტრამპი. 
  
  
• ამერიკელი პრეზიდენტის თქმით, შეხვედრის შედეგად ნათელი გახდება შესაძლებელია თუ არა საერთოდ შეთანხმება - "თუ აღმოჩნდა, რომ შეთანხმება შეუძლებელია, ევროპელ ლიდერებს და აშშ-ს ეცოდინება რა ვითარებაა და შემდგომ ნაბიჯებს შესაბამისად დაგეგმავენ."
  
  
• ამასთანავე, პოსტის დასკვნით ნაწილში ტრამპი წერს, რომ საეჭვოდ მიაჩნია უკრაინამ შეძლოს შეთანხმება პუტინთან "რომელიც ძალიან დაკავებულია მეორე მსოფლიო ომში გამარჯვების აღნიშვნით, რომელიც შეუძლებელი, წარმოუდგენელი იქნება ამერიკის გარეშე." 
  
  
• "გამართეთ შეხვედრა ახლავე"- წერს ტრამპი. 
   

Big Picture: ეს ვლადიმირ პუტინის საგანგებო გამოსვლაზე დონალდ ტრამპის მეორე გამოხმაურებაა - ცოტა ხნით ადრე ამერიკელმა პრეზიდენტმა განაცხადა, რომ სამშვიდობო პროცესში მკაფიო პროგრესია და მომდევნო კვირა გადამწყვეტი იქნება. 

• კრემლში გამოსვლისას პუტინმა უარი თქვა 30-დღიან სრულფორმატიან ზავზე და სანაცვლოდ 2022 წლის სტამბულის "შეთანხმებების" ბაზაზე უკრაინასთან პირდაპირი მოლაპარაკებების აღდგენის ინიციატივით გამოვიდა. 
  
  
• საუბარია დონალდ ტრამპის ადმინისტრაციის ინიციატივაზე, რომელსაც უკრაინა ჯერ კიდევ 11 მარტს, ჯედაში გამართულ შეხვედრაზე დასთანხმდა. 
  
  
• რუსეთმა ზავის სანაცვლოდ დასავლეთის მიერ უკრაინის სამხედრო დახმარების შეწყვეტა და ქვეყანაში მობილიზაციის შეჩერება მოითხოვა. 
  
  

Context: ამერიკული ადმინისტრაციის ინიციატივა 30-დღით ცეცხლის შეწყვეტის შესახებ კვლავ აქტუალური გახდა გასულ დღეებში, განსაკუთრებით 10 მაისს ევროპელი ლიდერების კიევში გამართული ვიზიტის შემდეგ. 

• გერმანიის, საფრანგეთის, გაერთიანებული სამეფოს ლიდერების კიევში ვიზიტის შემდეგ, უკრაინამ და ევროპელმა მოკავშირეებმა რუსეთისგან 30-დღიან სრულფორმატიან ცეცხლის შეწყვეტაზე დათანხმება მოითხოვს, წინააღმდეგ შემთხვევაში კი ახალი სანქციების დაწესებით დაიმუქრნენ.