ახალი ამბები

სირიის ლიდერმა აჰმედ აშ-შარაამ გერმანიის ფედერაციულ რესპუბლიკაში ვიზიტი გააუქმა. ბერლინში მისი ჩასვლის საპასუხოდ საპროტესტო აქციები იგეგმებოდა.

ვითარების არსი: გერმანიის მთავრობის პრესსამსახურის განცხადებით, სამუშაო ვიზიტი სირიულმა მხარემ გადადო.

• სირიის ახალი ლიდერი ბერლინში გერმანიის პრეზიდენტს, ფრანკ-ვალტერ შტაინმაიერს, კანცლერ ფრიდრიხ მერცს, ასევე პოლიტიკური და ბიზნესწრეების წარმომადგენლებს უნდა შეხვედროდა.
• მოლაპარაკებების მთავარ თემად სირიელი ლტოლვილების სამშობლოში დაბრუნება სახელდებოდა.
• გამოცემა ntv-ს ინფორმაციით, ვიზიტის გაუქმების მიზეზი, შესაძლოა, სირიაში მიმდინარე სასტიკი ბრძოლები გამხდარიყო.

ჩაშლილად: მანამდე სააგენტო dpa წერდა 19-20 იანვარს დაგეგმილი ვიზიტის წინააღმდეგ რამდენიმე საპროტესტო აქციის მომზადების შესახებ.

• დემონსტრანტები გეგმავდნენ მსვლელობას ფედერალური კანცლერიიდან ბრანდენბურგის კარიბჭემდე, ლოზუნგით: "აჰმედ ალ-შარაა — მერცის მიერ მოწვეული, ჩვენ მიერ მხილებული."
• გარდა ამისა, უნდა ჩატარებულიყო აქცია სახელწოდებით: "არა — წითელ ხალიჩას ისლამისტებისთვის."

დიდი სურათი: ალ-შარაას ჩასვლის წინააღმდეგ პირველ რიგში ის სირიელი ლტოლვილები გამოდიოდნენ, რომლებიც სირიის რელიგიურ და ეთნიკურ უმცირესობებს წარმოადგენენ.  

• ისინი ქვეყნიდან იმ რადიკალი ისლამისტების დევნის გამო გაიქცნენ, რომლებიც ხელისუფლებაში აშ-შარაას მეთაურობით მოვიდნენ. მათ შორის არიან ქრისტიანები, იეზიდები, დრუზები, ქურთები და ალავიტები.
• ქურთები სირიის ლიდერს დამატებით აკრიტიკებენ იმ სამხედრო ოპერაციის გამო, რომელსაც სამთავრობო ძალები და შინაგან საქმეთა სამინისტრო ამჟამად ალეპოს პროვინციაში ქურთული დაჯგუფებების წინააღმდეგ აწარმოებენ.