ახალი ამბები

უკრაინის პრეზიდენტმა ვოლოდიმირ ზელენსკიმ განაცხადა, რომ უკრაინას ტერიტორიულ საკითხთან დაკავშირებით პოზიცია არ შეუცვლია, ხოლო პროგრესისთვის საჭიროა ყველა მხარის მზაობა კომპრომისისთვის.

ვითარების არსი: ვილნიუსში, ლიეტუვისა და პოლონეთის ლიდერებთან ერთად გამართულ პრესკონფერენციაზე ზელენსკიმ აღნიშნა, რომ აბუ-დაბიში აშშ-ის, უკრაინისა და რუსეთის დელეგაციების შეხვედრის შემდეგ, პრობლემური საკითხები შემცირდა.

• ამავდროულად, ტერიტორიების პრობლემა უცვლელი რჩება, რადგან რუსეთს კვლავაც სურს მთელი დონბასის გაკონტროლება.
• "რუსეთს სურს ყველაფერი გააკეთოს იმისთვის, რომ ჩვენი სახელმწიფოს აღმოსავლეთში უკრაინა აღარ იყოს. მიზეზი გასაგებია, მათ ეს მიზნად დაისახეს, ამიტომ აბსოლუტურად ნათელია, რომ ამ მიზნის მიღწევა სურთ. ფრონტზე მათ ამის გაკეთება ჯერჯერობით არ შეუძლიათ. ჩვენი პოზიცია ჩვენს ტერიტორიებთან დაკავშირებით შემდეგია - უკრაინის ტერიტორიული მთლიანობა, რომელსაც პატივი უნდა სცენ," - თქვა პრეზიდენტმა.

ჩაშლილად: მან აღნიშნა, რომ ამერიკელები ცდილობენ იპოვონ კომპრომისი უკრაინასა და რუსეთს შორის დონბასის საკითხზე.

• ამისკენ გადადგმულ პირველ ნაბიჯად ზელენსკიმ შეხვედრების სამმხრივი ფორმატი დაასახელა, რომელიც დიდი ხნის განმავლობაში არ შეკრებილა. ამავდროულად, მან ხაზი გაუსვა, რომ კომპრომისისთვის ყველა მხარე უნდა იყოს მზად, მათ შორის ამერიკული მხარეც.
• "ჩვენ თანახმა ვართ სამმხრივ ფორმატში კომუნიკაციაზე. ეს არის პირველი ნაბიჯები იმისთვის, რომ, შესაძლოა, სწორედ ის კომპრომისი მოიძებნოს. მაგრამ კომპრომისისთვის საჭიროა, რომ ყველა მხარე იყოს ამისთვის მზად, სხვათა შორის, ამერიკული მხარეც," - დაამატა უკრაინის პრეზიდენტმა.

დიდი სურათი: 23-24 იანვარს არაბთა გაერთიანებულ საამიროებში აშშ-ის, უკრაინისა და რუსეთის სამმხრივი მოლაპარაკებები გაიმართა.

• შეხვედრების შედეგად მხარეები შეთანხმდნენ, რომ კონსულტაციებს 1 თებერვალს გააგრძელებენ.
• მოლაპარაკებების ერთ-ერთი თემა ტერიტორიული საკითხებია: უკრაინა დაჟინებით მოითხოვს ცეცხლის შეწყვეტას ამჟამინდელ ფრონტის ხაზზე, ხოლო რუსები დონეცკის ოლქის არაოკუპირებული ნაწილებიდან უკრაინული ჯარების გაყვანას ითხოვენ.