ახალი ამბები

შეერთებულმა შტატებმა რუსეთს კვლავ მოუწოდა The Wall Street Journal-ის კორესპონდენტი ევან გერშკოვიჩი და ყოფილი საზღვაო ქვეითი პოლ უელანი გაათავისუფლოს. მოსკოვის სასამართლომ ორივე ამერიკელს პატიმრობა გაუხანგრძლივა.

"ჩვენ კიდევ ერთხელ მოვუწოდებთ რუსეთს დაუყოვნებლივ გაათავისუფლოს ევანი და უსამართლოდ დაკავებული აშშ-ის მოქალაქე პოლ უელანი," - განაცხადა 24 აგვისტოს აშშ-ის სახელმწიფო დეპარტამენტის წარმომადგენელმა.

ევან გერშკოვიჩის დაკავების ვადის გახანგრძლივება გერმანიის ჟურნალისტთა კავშირმა გააპროტესტა.

"ბრალდებები ისეთივე აბსურდულია, როგორც გერშკოვიჩის მიმართ განხორციელებული ქმედებები. ჩვენს კოლეგას განტევების ვაცად იყენებენ აშშ-სა და რუსეთს შორის დიპლომატიური დაძაბულობისთვის. ამას ვერაფერი გაამართლებს. დაკავების გახანგრძლივება არის დარტყმა საერთაშორისო სამოქალაქო საზოგადოებაზე, რომელიც კამპანიას აწარმოებდა გერშკოვიჩის გათავისუფლებისთვის," - განაცხადა კავშირის თავმჯდომარის მოადგილემ მიკა ბეუსტერმა.

მანამდე მოსკოვის ლეფორტოვოს რაიონულმა სასამართლომ გამოძიების მოთხოვნით გერშკოვიჩს პატიმრობა კიდევ სამი თვით, 2023 წლის 30 ნოემბრამდე გაუხანგრძლივა. შეხვედრა დახურულ კარს მიღმა გაიმართა, რადგან სისხლის სამართლის საქმის მასალები გასაიდუმლოებულია.

ევან გერშკოვიჩის საქმე

აშშ-ის 32 წლის მოქალაქე ევან გერშკოვიჩის ეკატერინბურგში დაკავებაზე განცხადება 29 მარტს რუსეთის უშიშროების საზოგადოებასთან ურთიერთობის ცენტრმა გააკეთა. მეორე დღეს ლეფორტოვოს რაიონულმა სასამართლომ ის ჯაშუშობის ბრალდებით 29 მაისამდე დააკავა.

რუსეთის სპეცსამსახურები აცხადებენ, რომ ჟურნალისტი, "ამერიკული მხარის დავალებით ინფორმაციას აგროვებდა, რომელიც სახელმწიფო საიდუმლოებაა რუსეთის სამხედრო-სამრეწველო კომპლექსის ერთ-ერთი საწარმოს საქმიანობის შესახებ."

ევან გერშკოვიჩი პირველი უცხოელი რეპორტიორია, რომელიც 1986 წლიდან რუსეთში მსგავსი ბრალდებით დააკავეს. Bloomberg-ის ცნობით, გერშკოვიჩის დაკავებას რუსეთის პრეზიდენტმა ვლადიმერ პუტინმა პირადად დაუჭირა მხარი.