ახალი ამბები

The New York Times-ის ინფორმაციით, ირანთან ომის დროს ისრაელმა ირანელი პოლიტიკური და სამხედრო ლიდერებისა და ბირთვული მეცნიერების მდებარეობა მათი მცველებისა და მძღოლების ტელეფონების გატეხვით დაადგინა.

State Of Play: რამდენიმე ირანელ და ისრაელელ მაღალჩინოსანზე დაყრდნობით გამოცემა წერს, რომ ირანმა ისრაელის მიერ მათი ლიკვიდაციის საფრთხის გამო, თანამდებობის პირების უსაფრთხოება გააძლიერა. ამის გამო, მათ ისრაელს უნებლიედ საშუალება მისცეს უფრო მარტივად დაედგინათ მათი ლოკაცია.

• "ვიცით, რომ მაღალჩინოსნებსა და მეთაურებს ტელეფონები არ ჰქონდათ, მაგრამ მათ თანამოსაუბრეებს, დაცვის თანამშრომლებსა და მძღოლებს ტელეფონები ჰქონდათ, მათ გაფრთხილებები სერიოზულად არ მიუღიათ და ასე მოახერხეს მათი მდებარეობის დადგენა," - უთხრა NYT-ს სასან ქარიმიმ, რომელიც ირანის ამჟამინდელ მთავრობაში სტრატეგიის საკითხებში ვიცე-პრეზიდენტის მოადგილე იყო და ახლა პოლიტიკური ანალიტიკოსი და თეირანის უნივერსიტეტის ლექტორია.
• სტატიაში ნათქვამია, რომ ისრაელმა აღმოაჩინა, რომ მცველებს არა მხოლოდ ტელეფონები ჰქონდათ, არამედ მათ სოციალურ მედიაში პოსტების გამოქვეყნებისთვისაც იყენებდნენ.
• "ამდენი მცველის გამოყენება ის სისუსტეა, რომელიც ჩვენ მათ ვაიძულეთ და შევძელით, რომ ეს უპირატესობად გვექცია," - აცხადებს ისრაელელი მაღალჩინოსანი.

Big Picture: ისრაელის ოფიციალური პირები დეტალურად აღწერენ, თუ როგორ გეგმავდნენ ირანის ლიდერების განადგურებას ომის დასაწყისში, რადგან იცოდნენ, რომ მოულოდნელი თავდასხმის შემდეგ ეს გართულდებოდა.

• გენერალი ამირ ალი ჰაჯიზადე, რევოლუციის გუშაგთა კორპუსის საჰაერო ძალების მეთაური, პირველი სამიზნე იყო, უთხრა ერთ-ერთმა ირაელელმა მაღალჩინოსანმა The New York Times-ს. ჰაჯიზადემ სხვა მაღალი თანამდებობის პირები საგანგებო შეხვედრაზე შეკრიბა. შემდეგ კი ისინი ისრაელის დაბომბვის შედეგად განადგურდნენ.
• პირველი თავდასხმების შემდეგ მცველებს უბრძანეს, მხოლოდ რაციები გამოეყენებინათ. მხოლოდ გუნდის ლიდერებს, რომლებიც თანამდებობის პირებთან ერთად არ არიან, შეეძლოთ მობილური ტელეფონების ტარება.
• თუმცა, გამოცემის ცნობით, სულ მცირე, ერთ შემთხვევაში, მცველებმა დაარღვიეს ბრძანება, რის გამოც ისრაელმა პოლიტიკურ ლიდერებზე თავდასხმა ისევ მოახერხა. ამის მიუხედავად, ამ იერიშით ვერ მოხერხდა სამიზნის განადგურება.

Context: ისრაელსა და ირანს შორის 12-დღიანი კონფლიქტი 2025 წლის 13 ივნისს, ისრაელის მოულოდნელი თავდასხმით დაიწყო.

• ისრაელმა განაცხადა, რომ ირანის სამხედრო ლიდერებზე, ბირთვულ მეცნიერებზე, ურანის გამდიდრების ობიექტებსა და ბალისტიკური რაკეტების პროგრამაზე ყოვლისმომცველი იერიში აუცილებელი იყო, რადგან ირანი ბირთვული იარაღის შექმნას კრიტიკულად მიუახლოვდა.