ახალი ამბები

Wall Street Journal-ის ცნობით, თებერვალში ისრაელმა ერაყის უდაბნოში საიდუმლო სამხედრო ბაზა განათავსა, რათა ირანის წინააღმდეგ საჰაერო ოპერაციების წარმოება უზრუნველეყო.

ვითარების არსი: გამოცემა აღნიშნავს, რომ ისრაელმა ეს ბაზა 28 თებერვალს ირანზე დარტყმების დაწყებამდე ცოტა ხნით ადრე ააშენა. ბაზა ლოგისტიკური ცენტრის ფუნქციას ასრულებდა ისრაელის სამხედრო-საჰაერო ძალებისთვის.

• პუბლიკაციაში ნათქვამია, რომ ბაზაზე ასევე დისლოცირებული იყვნენ სპეციალური დანიშნულების რაზმები და სამძებრო-სამაშველო ჯგუფები, რომლებიც მზად იყვნენ მოქმედებისთვის იმ შემთხვევაში, თუ ისრაელელ პილოტებს ჩამოაგდებდნენ.
• WSJ-ის ცნობით, ფორპოსტის დასაცავად ისრაელის ჯარებმა ავიაიერიშებიც კი მიიტანეს ერაყის ძალებზე, რომლებმაც მარტის დასაწყისში ბაზა კინაღამ აღმოაჩინეს.
• დარტყმების შედეგად ერთი ერაყელი ჯარისკაცი დაიღუპა. ბაღდადმა მაშინ განაცხადა, რომ ადგილობრივი მწყემსი გახდა "არაჩვეულებრივი სამხედრო აქტივობის," მათ შორის ვერტმფრენებისა და სროლის მოწმე მოშორებულ ტერიტორიაზე.

სტრიქონებს შორის: WSJ წერს, რომ ისრაელის დარტყმებმა ერაყის ძალებს შემდგომი გამოძიების ჩატარებაში ხელი შეუშალა. ისრაელის თავდაცვის ძალებმა ინფორმაციაზე კომენტარის გაკეთებაზე უარი განაცხადა.

• ერაყმა, რომელიც მარტის თავდასხმაში თავდაპირველად აშშ-ს ადანაშაულებდა, მაშინ განაცხადა: "ეს დაუფიქრებელი ოპერაცია კოორდინაციისა და თანხმობის გარეშე განხორციელდა."
• WSJ-ის წყაროების თანახმად, აშშ-ს ამ ოპერაციაში მონაწილეობა არ მიუღია.
• "როგორც ჩანს, დარტყმამდე ადგილზე მოქმედებდა გარკვეული ძალა, რომელიც საჰაერო მხარდაჭერას იღებდა და ისეთი საშუალებებით სარგებლობდა, რაც ჩვენი ქვედანაყოფების შესაძლებლობებს აღემატება,
  - განაცხადა მაშინ ერაყის შეიარაღებული ძალების მაღალჩინოსანმა.

დიდი სურათი: ამ კონტექსტში ნახსენებია ისრაელის სამხედრო-საჰაერო ძალების მაშინდელი სარდლის, გენერალ-მაიორ თომერ ბარის განცხადება, რომელმაც აღნიშნა, რომ ირანთან კონფლიქტის დროს სპეცდანიშნულების რაზმები "არაჩვეულებრივ" ოპერაციებს ატარებდნენ.

• ექსპერტ მაიკლ ნაითსის თქმით, ერაყის დასავლეთ უდაბნო იდეალური ადგილია საიდუმლო ფორპოსტისთვის მისი დაბალი სიმჭიდროვისა და მასშტაბების გამო.
• ერაყი, რომელიც იორდანიასა და ირანს შორის მდებარეობს, ირანთან ომში ორივე მხრიდან განხორციელებული დარტყმების გამო აღმოჩნდა ჩათრეული.
• ვაშინგტონი დიდი ხანია სთხოვს ბაღდადს ირანის მიერ მხარდაჭერილი დაჯგუფებების განიარაღებას, რომლებიც ომის დროს ამერიკულ ობიექტებსა და ნავთობის საბადოებს ესხმოდნენ თავს.