პისტორიუსი: უკრაინის დახმარებაზე უარის თქმამ შეიძლება აშშ-ის ეკონომიკას ზიანი მიაყენოს
გერმანიის თავდაცვის მინისტრმა ბორის პისტორიუსმა ამერიკელ კანონმდებლებს მოუწოდა, უკრაინის სამხედრო დახმარება დაამტკიცონ და გააფრთხილა, რომ ასეთი მხარდაჭერის შეწყვეტამ შეიძლება ზიანი მიაყენოს ამერიკის ეკონომიკურ ინტერესებს.
ამის შესახებ Bloomberg წერს.
მისი თქმით, თუ კრემლის აგრესია არ შეჩერდება, შეიძლება არა მხოლოდ ზიანი მიაყენოს უსაფრთხოების თანამშრომლობას და დააზიანოს აშშ-ის თავდაცვის კონტრაქტორები, არამედ მთლიანად შეასუსტოს ევროპა და შეაფერხოს ევროკავშირის სავაჭრო ურთიერთობები მსოფლიოს უდიდეს ეკონომიკასთან.
"ჩვენი ტრანსატლანტიკური თანამშრომლობის ერთ-ერთი ასპექტია ის, რომ ჩვენ გავაფორმეთ მილიარდობით დოლარის ღირებულების ასობით კონტრაქტი და ვამზადებთ ახალ კონტრაქტებს. ნათელია, რომ უსაფრთხოების ალიანსს ბევრი სარგებელი მოაქვს ორივე მხარისთვის," - თქვა პისტორიუსმა.
მან ასევე აღნიშნა, რომ უკრაინის დამარცხებას შესაბამისი შედეგები ექნება არა მხოლოდ ევროპისთვის, არამედ შეერთებული შტატებისთვისაც და თქვა, რომ რუსეთის შეჭრა საფრთხეს უქმნის "წესებზე დაფუძნებულ საერთაშორისო წესრიგს."
"ევროპა გეოგრაფიულად შორს არის აიოვას ან ვისკონსინისგან, მაგრამ მაინც ძალიან ახლოსაა უსაფრთხოების პოლიტიკის თვალსაზრისით. ნაკლები უსაფრთხოება ევროპაში ნიშნავს ნაკლებ უსაფრთხოებას შეერთებული შტატებისთვის," - თქვა პისტორიუსმა.
გერმანიის თავდაცვის მინისტრმა განაცხადა, რომ თავისუფლება თავისთავად არ არსებობს, რადგან ის უნდა იყოს დაცული და საჭიროების შემთხვევაში მისთვის ბრძოლაა საჭირო.
მან ასევე აღნიშნა, რომ ევროპულმა ქვეყნებმა მეტი იარაღი უნდა მიაწოდონ უკრაინას და ხედავს, რომ მოკავშირეები სულ უფრო მეტად ეხმარებიან კიევს.
"დიდი ბრიტანეთი უფრო მეტს აკეთებს, საფრანგეთი ზრდის მის მხარდაჭერას. მე აბსოლუტურად დარწმუნებული ვარ, რომ ჩვენ შეგვიძლია მივაღწიოთ მნიშვნელოვან მხარდაჭერას მომდევნო თვეებისა და წლების განმავლობაში. მაგრამ, რა თქმა უნდა, ეს ადვილი არ არის. ფული არ არის შეუზღუდავი," - დასძინა პისტორიუსმა.
.png)
