ახალი ამბები

10 სექტემბრის დილას პოლონეთის საჰაერო სივრცეში შეჭრილი რუსული დრონების ნაწილის სამიზნე ქალაქ ჟეშუვში მდებარე ნატოს სამხედრო ბაზა იყო — ჟეშუვი უკრაინის სამხედრო დახმარების ოპერაციის მთავარი ლოჯისტიკური ცენტრია.

ვითარების არსი: ამის შესახებ, წინასწარი გამოძიების შეფასებებზე დაყრდნობით, Der Spiegel წერს, ხოლო Welt-ის ინფორმაციით, რუსული დრონები ლიეტუვის საჰაერო სივრცეშიც შენიშნეს.

• პოლონეთის მიერ ჩატარებული წინასწარი გამოძიების შედეგები ნატოს შიდა ბრიფინგზე წარადგინეს.
  
  
• გერმანული პრესის ცნობით, დრონები ჟეშუვში მდებარე სამხედრო ბაზისკენ პირდაპირი ტრაექტორიით მიფრინავდნენ — საუბარია მინიმუმ ხუთ დრონზე.
  
  
• დრონების გადაჭერის ოპერაციაში მონაწილეობა მიიღო ნიდერლანდების საჰაერო ძალების კუთვნილმა F-35 ტიპის გამანადგურებელმა. წყაროების ცნობით, ბორტმა სამი უპილოტო საფრენი აპარატი ჩამოაგდო, დანარჩენი ორი კი დაუდგენელი მიზეზების გამო ჩამოვარდა.

ჩაშლილად: Welt-ის ინფორმაციით, სულ უფრო მეტი მტკიცებულებაა, რომ დრონები პოლონეთის საჰაერო სივრცეში შემთხვევით ან შეცდომით არ აღმოჩენილა.

• ამის ერთ-ერთ დასტურად გამოცემას მოჰყავს ლიეტუვის საჰაერო სივრცეში გამოჩენილი რუსული დრონები, რომლის შესახებაც მანამდე არ იყო ცნობილი.
• „არსებულ ინფორმაციაზე დაყრდნობით, ჩვენ ვვარაუდობთ, რომ უპილოტო საფრენმა აპარატებმა მიზანმიმართულად დაარღვიეს ნატოს საჰაერო სივრცე,“ — ამბობს გამოცემასთან საუბარში ნატოს ერთ-ერთი მაღალჩინოსანი.
  
  
• ნატოში მიაჩნიათ, რომ პოლონეთის საჰაერო სივრცის დარღვევით რუსეთს სურდა გაერკვია საჰაერო თავდაცვის სისტემის მდგომარეობა და რეაგირების სიჩქარე.
  
  
• პირდაპირი შეტევის ვერსიას ნატოში არ განიხილავენ, რადგან ჩამოგდებული დრონების ნარჩენებში ასაფეთქებელი ნივთიერებების კვალი არ აღმოჩნდა.

კონტექსტი: ჟეშუვის ლოჯისტიკური ცენტრი უკრაინისთვის შეიარაღებისა და ჯავშანტექნიკის მიწოდების ერთ-ერთი მთავარი და უმსხვილესი სატრანსპორტო არტერიაა.

• პოლონეთის შინაგან საქმეთა სამინისტროს ცნობით, 10 სექტემბერს ქვეყნის საჰაერო სივრცეში სულ 19 მფრინავი ობიექტი შეიჭრა.
  
  
• ამ დროისთვის აღმოჩენილია შვიდი დრონისა და ერთი რაკეტის ნარჩენები.