ახალი ამბები

შეერთებული შტატების მუდმივი წარმომადგენელი ჩრდილო-ატლანტიკურ ალიანსში უკრაინის შეიარაღების შესახებ მნიშვნელოვან განცხადებას აანონსებს. 

ვითარების არსი: ამის შესახებ მეთიუ უაიტაკერმა ბრიუსელში გამართულ პრეს-კონფერენციაზე განაცხადა. 

• უიტაკერს არ დაუკონკრეტებია თუ რა შეიარაღებაზეა საუბარი, თუმცა მისი თქმით გადაწყვეტილება ხვალ, 15 ოქტომბერს გამოცხადდება. 
  
  
• ამავე გამოსვლაში უაიტაკერმა განაცხადა, რომ სამხრეთ-ევროპული ქვეყნები უფრო აქტიურად უნდა ჩაერთნონ PURL-ის პროგრამაში, რომლის ფარგლებშიც ევროპული ქვეყნების დაფინანსებით უკრაინა ამერიკულ შეიარაღებას იღებს. 
  
  
• "ეს პროგრამა საციცოცხლოდ მნიშვნელოვანია რათა რუსეთს მოლაპარაკებების მაგიდასთან დაჯდომა ვაიძულოთ"- განაცხადა უაიტაკერმა. 
  
  

დიდი სურათი: ჯერჯერობით უცნობია, თუ კონკრეტულად რა შეიარაღებაზეა საუბარი, თუმცა გასულ კვირებში მთავარი თემა Tomahawk-ის ტიპის შორეული რაკეტების გადაცემა იყო. 

• 7 ოქტომბერს დონალდ ტრამპმა განაცხადა, რომ "თითქმის" გადაწყვეტილი აქვს უკრაინისთვის შორეული რაკეტების მიწოდება - უნდა გავარკვიოთ როგორ გამოიყენებენ ამ რაკეტებს, სად გაგზავნიან. ვფიქრობ ეს კითხვა უნდა დავსვა."
  
  
• დასავლური მედია წერდა, რომ სექტმებერში, ვოლოდიმირ ზელენსკისთან გამართული შეხვედრის შემდეგ, დონალდ ტრამპი დათანხმდა უკრაინის განკარგულებაში არსებული შეიარაღების გამოყენებაზე შეზღუდვების მოხსნას, თუმცა უარი თქვა Tomahawk-ების მიყიდვაზე. 
  
  
• ცოტა ხნის წინ ვალდაის ფორუმზე დასმული კითხვის პასუხად ვლადიმირ პუტინმა განაცხადა, რომ უკრაინისთვის Tomahawk-ების გადაცემა, მიმდინარე ომის ესკალაციის ახალი ფაზა იქნება და რომ ეს "მოსპობს რუსეთ-ამერიკის ორმხრივ ურთიერთობებში ბოლო თვეების განმავლობაში გამოკვეთილ დადებით ტენდენციებს. 
  
  

კონტექსტი: აღნიშნული რაკეტების მოქმედების რადიუსი დაახლოებით 2500 კილომეტრია, ამგვარად მათი მეშვეობით უკრაინა შეძლებს დარტყმების განხორციელებას არამხოლოდ მოსკოვსა და პეტერბურგზე, არამედ რუსეთის კიდევ 60 მოშორებულ რეგიონზე.

• ამ საკითხზე გამოქვეყნებულ ვრცელ მასალაში საინფორმაციო სააგენტო Reuters წერდა, რომ მარაგების სიმცირისა და სხვა ტექნიკური სირთულეების გამო TOMAHAWK-ების გადაცემა ნაკლებად მოსალოდნელია.
  
  
• გამოცემის ცნობით, უკრაინა სავარაუდოდ სხვა ტიპის შეიარაღებას მიიღებს, რომლის მოქმედების რადიუსიც TOMAHAWK-ზე ნაკლებია, თუმცა ჯერადად აღემატება უკრაინის არმიის ახლანდელ შესაძლებლობებს.
  
  

სიღრმისეულად: აშშ-ს უკრაინისთვის მხოლოდ 20-დან 50-მდე Tomahawk-ის რაკეტის გადაცემა შეუძლია – FT