ახალი ამბები

გერმანიის კანცლერმა ფრიდრიხ მერცმა განაცხადა, ირანის ხელისუფლება ამერიკის შეერთებულ შტატებს "ამცირებს". მან მიანიშნა, რომ თეირანმა მოლაპარაკებების მაგიდასთან ტრამპის ადმინისტრაციას აჯობა.

ვითარების არსი: ორი დღის წინ დონალდ ტრამპმა გააუქმა ამერიკის დელეგაციის ვიზიტი ისლამაბადში, სადაც ირანულ დელეგაციასთან არაპირდაპირი მოლაპარაკებები უნდა გამართულიყო.

• წინა რაუნდი პაკისტანის დედაქალაქში ორი კვირის წინ შედგა, რომელსაც აშშ-ის ვიცე-პრეზიდენტი ჯეი დი ვენსი ხელმძღვანელობდა, თუმცა ის პროგრესის გარეშე დასრულდა.
• მარსბერგში სტუდენტებთან საუბრისას მერცმა მიანიშნა, რომ სწორედ ტრამპის გუნდი აღმოჩნდა დამარცხებული.
• "ირანელები, როგორც ჩანს, ძალიან დახელოვნებულნი არიან მოლაპარაკებებში, უფრო სწორად, ძალიან დახელოვნებულნი არიან იმაში, რომ მოლაპარაკებები არ აწარმოონ - ამერიკელებს ისლამაბადში აგზავნიან და შემდეგ მათ ისევ ყოველგვარი შედეგის გარეშე უშვებენ," - განაცხადა მან.
• "ირანის ხელისუფლება, განსაკუთრებით კი ეს ე.წ. რევოლუციის გუშაგები, მთელ ერს ამცირებენ. ამიტომ, იმედი მაქვს, ეს ყველაფერი რაც შეიძლება მალე დასრულდება." - ხაზი გაუსვა მერცმა.

ჩაშლილად: ორშაბათს, ირანმა წარადგინა ცეცხლის შეწყვეტის შესახებ ახალი წინადადება, რომელიც ფოკუსირებულია ჰორმუზის სრუტის გახსნაზე, ხოლო ბირთვულ იარაღზე, რაკეტებზე, სანქციებსა და სხვა საკითხებზე მსჯელობა სამომავლოდ გადადო.

• ირანის პარლამენტის მიერ მომზადებული კანონპროექტის თანახმად, გადამზიდავებს მოუწევთ თეირანისთვის "მომსახურების" საფასურის გადახდა სრუტის გავლისას, რაც ომამდე უფასო იყო.
• გაეროს საერთაშორისო საზღვაო ორგანიზაციამ (IMO) კატეგორიულად უარყო სრუტეში გამავალი გემებისთვის საფასურის დაწესების იდეა.
• ორგანიზაციის გენერალურმა მდივანმა არსენიო დომინგესმა განაცხადა: "საერთაშორისო ნავიგაციისთვის განკუთვნილ სრუტეებზე რაიმე გადასახადის, ბაჟის ან მოსაკრებლის შემოღების სამართლებრივი საფუძველი არ არსებობს."

დიდი სურათი: შეთავაზება "ჯერ ჰორმუზი" მიუთითებს თეირანის პოზიციის მნიშვნელოვან ცვლილებაზე. მანამდე რეჟიმი ნავთობის, გაზისა და ყურის სხვა ქვეყნების ექსპორტის ბლოკადას იყენებდა ბერკეტად უსაფრთხოების ფართო გარანტიების მისაღებად.

• თუმცა, ისლამაბადის მოლაპარაკებების ჩავარდნის შემდეგ, ტრამპმა ირანის პორტებში მიმავალი გემებისთვის საპასუხო ბლოკადა დააწესა, რამაც ირანის უმძიმესი ეკონომიკური კრიზისი კიდევ უფრო გაამწვავა.
• საერთაშორისო სავალუტო ფონდის პროგნოზით, წელს ირანის მთლიანი შიდა პროდუქტი 6.1%-ით შემცირდება, ხოლო წლიური ინფლაცია თითქმის 70%-ს შეადგენს, სადაც პირველადი მოხმარების პროდუქტებსა და ჯანდაცვაზე ფასები კიდევ უფრო მაღალი ტემპით იზრდება.
• ბლოკადამ ასევე შეაფერხა ირანის ცარიელი ტანკერების პორტებში დაბრუნება, სადაც ისინი საცავებად შეიძლებოდა გამოეყენებინათ. ირანს პროდუქციის შესანახი რესურსი ეწურება, ხოლო წარმოების შეჩერებას მის ენერგეტიკულ სექტორზე გრძელვადიანი დამაზიანებელი ეფექტი ექნება.