ახალი ამბები

დონალდ ტრამპის მხარდამჭერი, MAGA მოძრაობის ერთ-ერთ ყველაზე პოპულარულ საჯარო სახესა და ლიდერს, ჩარლი კირკს, იუტაში სტუდენტებთან შეხვედრის დროს ესროლეს.

ვითარების არსი: ამერიკული მედიის ცნობით, კირკი ჰოსპიტალიზებულია, მისი ჯანმრთელობის მდგომარეობა უცნობია.

• თავდასხმის ამსახველი კადრების მიხედვით, კირკი ყელის არეშია დაჭრილი. ვრცელდება სავარაუდო თავდამსხმელის დაკავების კადრები.

ჩაშლილად: შემთხვევა ორემის უნივერსიტეტის კამპუსში, კირკის მიერ ორგანიზებული საჯარო დისკუსიის დაწყებიდან რამდენიმე წუთში მოხდა. ცნობების მიხედვით, თავდამსხმელმა მხოლოდ ერთხელ გასროლა მოასწრო.

• კირკი იუტაში იმყოფებოდა მისი საშემოდგომო კამპუსის ტურნეს (American Comeback Tour) ფარგლებში. ტურნეს პირველი ღონისძიება სწორედ ორემის კამპუსში იმართებოდა.
  
  
• კირკს დაგეგმილი ჰქონდა გამოსვლები იუტასა და იუტას სახელმწიფო უნივერსიტეტებში. ღონისძიებების დაანონსებას სტუდენტთა ნაწილის მხრიდან პროტესტი მოჰყვა.
  
  
• იუტას უნივერსიტეტის საიტზე გამოქვეყნებულ პეტიციას, რომელიც კამპუსში კირკის ღონისძიების გაუქმებას ითხოვდა, 7 ათასზე მეტი ადამიანი აწერს ხელს.

გამოხმაურება: შემთხვევას საკუთარ სოციალურ ქსელ Truth-ში უკვე გამოეხმაურა ამერიკის პრეზიდენტი: „ყველამ ჩარლი კირკისთვის უნდა ვილოცოთ, საოცარი ადამიანისთვის,“ — წერს დონალდ ტრამპი.

• ამერიკელებს ლოცვისკენ მოუწოდა ვიცე-პრეზიდენტმა, ჯეი დი ვენსმაც.
  
  
• გამოძიების მიმართ განსაკუთრებული ყურადღების შესახებ განაცხადა გამოძიების ფედერალური ბიუროს დირექტორმა, კეშ პატელმა.
  
  
• მომხდარი დაგმეს კირკის პოლიტიკურმა ოპონენტებმა, მათ შორის კალიფორნიის დემოკრატმა გუბერნატორმა, გევინ ნიუსომმაც.

კონტექსტი: ჩარლი კირკი ამერიკაში პოპულარული ახალი, მემარჯვენე მედია ეკოსისტემის ერთ-ერთი ყველაზე ცნობადი სახეა. ის კონსერვატიული მობილიზების ახალგაზრდული ცენტრის — Turning Point U.S.A.-ის დამფუძნებელია.

• სწორედ ამ ორგანიზაციის ეგიდით ტარდება კირკის პოპულარული შეხვედრები საუნივერსიტეტო კამპუსებში უკვე რამდენიმე წელია.
  
  
• კომენტატორების ცნობით, ჩარლი კირკმა დიდი როლი შეასრულა გასული წლის საპრეზიდენტო არჩევნებზე დონალდ ტრამპისთვის ახალგაზრდა ელექტორატის მობილიზებაში.
  
  
• მისი YouTube-პოდკასტი, The Charlie Kirk Show, დონალდ ტრამპის ღია მხარდამჭერად პოზიციონირებს და ხშირად აკრიტიკებს არა მხოლოდ მოწინააღმდეგე ბანაკის პოლიტიკოსებს, არამედ რესპუბლიკელებსაც, რომლებიც გარკვეულ შემთხვევებში შესაძლოა არ ეთანხმებოდნენ დონალდ ტრამპს.