ახალი ამბები

ე.წ. სამშვიდობო მემორანდუმის პირობებს უკრაინა რუსეთისგან უახლოეს დღეებში მიიღებს, თუმცა კვლავ გაურკვეველია შედგება, თუ არა დონალდ ტრამპის მიერ შეთავაზებული პირდაპირი მოლაპარაკებები ვატიკანში. 

State Of Play: რუსეთის ფედერაციის საბჭოს თავმჯდომარის, კონსტანტინ კოსაჩოვის თქმით, მემორანდუმზე მუშაობა ფინალურ ეტაპზეა და დოკუმენტს კიევი ტყვეთა გაცვლის (1000x1000) დასრულების შემდეგ მიიღებს. 

• კოსაჩოვი ამბობს, რომ ნაკლებად სავარაუდოა მემორანდუმის პუნქტები გასაჯაროვდეს, რადგანაც მოლაპარაკებების პროცესი "რთული და დელიკატურია"
  
  
• 23 მაისს მსგავსი შინაარსის განცხადება გაავრცელა საგარეო საქმეთა მინისტრმა - სერგეი ლავროვის თქმით, კიევი სამშვიდობო მემორანდუმის პირობებს ტყვეთა გაცვლის დასრულების შემდეგ მიიღებს. 
  
  
• რუსეთსა და უკრაინას შორის უკვე შედგა გაცვლის 2 ეტაპი, რის შედეგადაც სამშობლოში თითქმის 700 უკრაინელი დაბრუნდა, მათი უმეტესობა სამხედრო ტყვეა. სავარაუდოა, რომ გაცვლის მესამე ეტაპი ხვალ, 25 მაისს შედგება. 
  
  

Big Picture: ტყვეთა გაცვლა მხარეებს შორის 16 მაისს, სტამბოლში გამართული შეხვედრის ერთადერთი ხელშესახები შედეგია. რაც შეეხება ე.წ. სამშვიდობო მემორანდუმს - ეს ვლადიმირ პუტინსა და დონალდ ტრამპს შორის გამართული რიგით მესამე სატელეფონო საუბრის შედეგია. 
 

• საუბრის დასრულების შემდეგ დონალდ ტრამპმა განაცხადა, რომ რუსეთი და უკრაინა დაუყოვნებლივ იწყებდნენ მოლაპარაკებებს ცეცხლის შეწყვეტის შესახებ და რომ რუსეთი წარმოადგენდა სამშვიდობო მემორანდუმის მისთვის მისაღებ ვერსიას. 
  
  
• ამავე პოსტში რუსეთ-უკრაინის მოლაპარაკებების შესაძლო ადგილად დონალდ ტრამპმა ვატიკანი დაასახელა. მალევე მოლაპარაკებების მასპინძლობის მზაობის შესახებ განაცხადეს ვატიკანშიც - "დატანჯული უკრაინა ელოდება მყარ, სამართლიან მშვიდობას"- განაცხადა ლეო მეთოთხმეტემ ინტრონიზაციის გამოსვლაში. 
  
  
• დასავლური მედია წერდა, რომ დონალდ ტრამპი ვატიკანში მარკო რუბიოსა და კიტ კელოგის გაგზავნას აპირებს - მიუხედავად ამისა, რუსეთის საგარეო საქმეთა მინისტრმა განაცხადა, რომ ვატიკანში მოლაპარაკებებია ნაკლებად რეალისტურია.
  
  
• "ეს ცოტათი არაელეგანტურია, როდესაც 2 მართმადიდებელი ქვეყანა კათოლიკურ მოედანზე განიხილავს კონფლიქტის პირველადი მიზეზების მოგვარების საშუალებებს"- განაცხადა ლავროვმა. 

Context: Bloomberg-ის წყაროების ცნობით, ვატიკანში მოლარაპაკებები შესაძლოა მომდევნო კვირიდან გაიმართოს, 26 მაისი - 1 ივნისის შუალედში. გამოცემის ცნობით, შეხვედრის ირგვლივ კვლავ ბევრი ბუნდოვანებაა, რადგანაც მოლაპარაკებებისთვის საუკეთესო ადგილად კრემლი სტამბოლს მიიჩნევს. 

• სავარაუდოა, რომ რუსეთის მიერ უკრაინისთვის გადასაცემ პირობები კვლავ მაქსიმალისტური იქნება და გაიმეორებს რუსული დელეგაციის მიერ სტამბოლში წარდგენილ პუნქტებს - ამაზე მეტყველებს კრემლის საჯარო განცხადებები. 
  
  

Go Deeper: დიპლომატიის მოლოდინში კრემლი ზელენსკის არალეგიტიმურობასა და ბუფერულ ზონაზე საუბრობს