ახალი ამბები

ალასკაში გამართული სამიტის მიმდინარეობის გარკვეულ მომენტში, ვლადიმირ პუტინის მაქსიმალისტური მოთხოვნების გამო დონალდ ტრამპი მზად იყო შეეწყვიტა მოლაპარაკებები, თუმცა პუტინმა მალევე უკან დაიხია. 

State Of Play: ინფორმაციას ამის შესახებ ვითარებაში გაცნობიერებულ წყაროებზე დაყრდნობით Axios ავრცელებს - წყაროების ცნობით, ტრამპის მთავარი მიზანი პუტინისა და ზელენსკის შეხვედრის ორგანიზებაა, სხვა ყველაფერი კი სწორედ ამისთვისაა საჭირო. 

• ალასკაში გამართულ მოლაპარაკებებზე რუსეთის პრეზიდენტმა განსაკუთრებით ხისტი პოზიციები დაიკავა ტერიტორიულ საკითხთან დაკავშირებით და ომის შეჩერების სანაცვლოდ დონეცკის ოლქის მთლიანად მიღებას ითხოვდა - პუტინის უკომპრომისო პოზიციის ფონზე დონალდ ტრამპი მზად იყო შეეწყვიტა მოლაპარაკებები. 
  
  
• "თუ კი მთავარი საკითხი დონეცკია და თუ კი არ ხართ მზად კომპრომისისთვის, ვფიქრობ ეს შეხვედრა აღარ უნდა გავაგრძელოთ"- წყაროების ცნობით, ასე მიმართა დონალდ ტრამპმა თავის რუს კოლეგას, რის შემდეგაც რუსეთის პრეზიდენტმა უკან დაიხია. 
  
  
• ამერიკული დაზვერვის შეფასებით დონეცკში საომარი მოქმედებების განვითარების რამდენიმე სცენარია, ერთ-ერთ მათგანში რუსეთის არმიამ დონეცკის ოლქი შესაძლოა ოქტომბრისთვის დაიკავოს. 
  
  
• არსებობს განსხვავებული შეფასებებიც, რომლის მიხედვითაც რუსეთის არმიას ახლო მომავალში არ ძალუძს ფრონტის საჭირო მასშტაბით გარღვევა. 
  
  

Big Picture: მასალა, რომელშიც აღნიშნული ცნობებია მოყვანილი დონალდ ტრამპის 3-ეტაპიან სტრატეგიას ეხება - თეთრ სახლში ვოლოდიმირ ზელენსკისთან დღეს გასამართი შეხვედრის შემდეგ, ტრამპის გუნდის მთავარი მიზანი პუტინისა და ზელენსკის შეხვედრის ორგანიზებაა. 

• "დარწმუნებული ვარ პუტინი ყურადღებით დააკვირდება დღევანდელ შეხვედრას თეთრ სახლში, მაგრამ ჯამურად ადმინისტრაციაში აქვთ განწყობა, რომ რუსეთის პრეზიდენტი დათანხმდება ვოლოდიმირ ზელენსკისთან შეხვედრას"- ამბობს გამოცემასთან საუბარში ერთ-ერთი წყარო. 
  
  

Break It Down: დასავლური მედიის ცნობით, ალასკაში ტრამპთან შეხვედრისას ომის შესაჩერებლად დონბასიდან უკრაინული ჯარების გაყვანა მოითხოვა და სანაცვლოდ განაცხადა, რომ მზად არის ხერსონსა და ზაპორიჟიაში ფრონტი გაყინოს. 

• პუტინთან შეხვედრის შემდეგ დონალდ ტრამპმა უარი თქვა მანამდე გაჟღერებულ ოფიციალურ მიზანზე, ცეცხლის შეწყვეტაზე და თქვა, რომ საუკეთესო გზა დიდ სამშვიდობო შეთანხმებაზე მუშაობაა. 
  
  
• ტრამპის შეცვლილი პოზიცია უფრო ახლოსაა კრემლის მიერ გაჟღერებულ მოთხოვნებთან, რომლის მიხედვითაც ცეცხლის შეწყვეტა არ არის საჭირო სამშვიდობო მოლაპარაკებებისთვის. 
  
  
• წინააღმდეგობრივი ცნობების ფონზე ტრამპის ადმინისტრაციის მაღალჩინოსნები მედიასთან საუბარში ამბობენ, რომ შტატები არ აიძულებენ უკრიანას ტერიტორიული დათმობებს. 
  
  

Сontext: წყაროების ცნობით, ცეცხლის შეწყვეტის საკითხის გარდა, ალასკაში გამართული შეხვედრის შემდეგ შეიცვალა დონალდ ტრამპის პოზიცია უკრაინის უსაფრთხოების გარანტიებთან დაკავშირებითაც. 

• იტალიის პრემიერ-მინისტრის თქმით, დონალდ ტრამპი დათანხმდა უკრაინისთვის ჩრდილო-ატლანტიკური ხელშეკრულების მეხუთე მუხლის (ჩანაწერი კოლექტიური თავდაცვის შესახებ) მსგავსი უსაფრთხოების გარანტიებს. 
  
  
• გამოცემას Axios-სთან საუბარში ტრამპის ერთ-ერთი მრჩეველი ამბობს, რომ ასეთ გარანტიები შესაძლოა უკრაინაში ამერიკული ჯარების განლაგებასაც მოიცავდეს.